గర్భాశయంలో వచ్చే ఫైబ్రాయిడ్లు అనేవి క్యాన్సర్ లేని గడ్డలే అయినప్పటికీ, అవి మహిళల రోజువారీ జీవితాన్ని నరకంలా మారుస్తాయి. తీవ్రమైన నొప్పి, అధిక రక్తస్రావం వంటి లక్షణాలతో ఇవి మొదలై, చివరికి సంతానలేమికి కూడా దారితీయవచ్చు. మన ఆరోగ్యంపై ఇవి చూపే ప్రభావం ఏంటి? వీటిని సకాలంలో ఎలా గుర్తించాలి? అసలు ఫైబ్రాయిడ్స్ వల్ల వచ్చే ప్రధాన సమస్యల గురించి తెలుసుకుందాం..
అతి రక్తస్రావం – అసౌకర్యం: గర్భాశయంలో ఫైబ్రాయిడ్లు ఏర్పడినప్పుడు కనిపించే మొదటి లక్షణం నెలసరిలో వచ్చే మార్పులు. సాధారణం కంటే ఎక్కువగా రక్తస్రావం అవ్వడం, రక్తం గడ్డల రూపంలో పడటం జరుగుతుంది. ఇక దీనివల్ల మహిళలు తీవ్రమైన నీరసానికి లోనవుతారు.నెలసరి సమయంలో కడుపులో విపరీతమైన నొప్పి రావడం వల్ల వారి దైనందిన పనులు కూడా చేసుకోలేక ఇబ్బంది పడుతుంటారు. ఈ సమస్యను నిర్లక్ష్యం చేస్తే శరీరంలో రక్తం తగ్గి ఎనీమియా వంటి ఇతర అనారోగ్య సమస్యలు తలెత్తుతాయి.
ఒత్తిడి వల్ల వచ్చే ఇతర సమస్యలు: ఫైబ్రాయిడ్లు పరిమాణంలో పెద్దవిగా పెరిగినప్పుడు, అవి పక్కనే ఉండే ఇతర అవయవాలపై ఒత్తిడిని పెంచుతాయి. ముఖ్యంగా మూత్రాశయం మీద ఈ గడ్డల ప్రభావం పడటం వల్ల తరచూ మూత్ర విసర్జన చేయాల్సి రావడం లేదా మూత్రం పూర్తిగా రాకపోవడం వంటి ఇబ్బందులు వస్తాయి. ఇక అంతేకాకుండా, ఇవి ప్రేవులపై ఒత్తిడి తేవడం వల్ల జీర్ణక్రియ మందగించి, మలబద్ధకం మరియు పొత్తికడుపు ఉబ్బరంగా అనిపించడం వంటి సమస్యలు బాధిస్తాయి.
సంతానలేమి – గర్భస్రావం ప్రమాదం: కొన్ని రకాల ఫైబ్రాయిడ్లు గర్భసంచి లోపలి పొరల్లో పెరుగుతాయి. ఇవి పిండం గర్భాశయానికి అతుక్కోవడానికి ఆటంకం కలిగిస్తాయి. దీనివల్ల పెళ్లయిన కొత్తలో గర్భం దాల్చడం ఆలస్యం కావచ్చు. ఇక ఒకవేళ గర్భం దాల్చినప్పటికీ, ఫైబ్రాయిడ్ల వల్ల గర్భస్రావం అయ్యే అవకాశాలు ఎక్కువగా ఉంటాయి. అందుకే సంతానాన్ని కోరుకునే వారు ఈ గడ్డల విషయంలో ముందుగానే డాక్టర్ సలహా తీసుకోవడం చాలా ముఖ్యం.
అవగాహనే మొదటి చికిత్స: ఫైబ్రాయిడ్లు అనగానే భయపడాల్సిన అవసరం లేదు, కానీ అప్రమత్తంగా ఉండటం అవసరం. పైన చెప్పిన లక్షణాలలో ఏవి కనిపించినా వెంటనే గైనకాలజిస్ట్ను సంప్రదించి స్కానింగ్ చేయించుకోవాలి. సరైన సమయంలో వైద్యం తీసుకుంటే ఎటువంటి కాంప్లికేషన్స్ లేకుండా వీటిని నయం చేసుకోవచ్చు. ఇక ఆరోగ్యకరమైన ఆహారం, క్రమం తప్పని వ్యాయామం ఈ సమస్యను దూరం చేయడంలో ఎంతో సాయపడతాయి.
