మనం తినే ఆహారం, తాగే నీటి ద్వారా మైక్రోప్లాస్టిక్స్ శరీరంలోకి వెళ్తున్నాయని మనందరికీ తెలుసు. అయితే చింతపండు గింజలు ఈ ప్లాస్టిక్ను బయటకు పంపిస్తాయనే వార్త నెట్టింట హల్చల్ చేస్తోంది. నిజంగానే చింతపండు గింజల్లో అంత శక్తి ఉందా? నీటిలోని ప్లాస్టిక్ను శుద్ధి చేసే ఈ గింజలు మన శరీరంలోని ప్లాస్టిక్ను కూడా తొలగిస్తాయా? తాజా పరిశోధనలు ఏం చెబుతున్నాయో ఇప్పుడు వివరంగా తెలుసుకుందాం.
నీటిని శుద్ధి చేసే చింతపండు గింజలు: ఇటీవల జరిగిన ల్యాబ్ ప్రయోగాల్లో ఒక ఆసక్తికరమైన విషయం బయటపడింది. మన చింతపండు గింజలకు నీటిలో కలిసిపోయి ఉండే సూక్ష్మ ప్లాస్టిక్ (మైక్రోప్లాస్టిక్) కణాలను ఆకర్షించే గుణం ఉందని శాస్త్రవేత్తలు గుర్తించారు. ఇక ఈ గింజల నుంచి తీసిన కొన్ని పదార్థాలు నీటిలోని ప్లాస్టిక్ కణాలను అయస్కాంతంలా పట్టుకుని బంధిస్తాయి. దీనివల్ల మురికి నీటిని క్లీన్ చేయడానికి ఇవి ఒక సహజమైన ప్రత్యామ్నాయంగా కనిపిస్తున్నాయి.
శరీరంలో ప్లాస్టిక్ పరిస్థితి ఏంటి?: నీటిని శుద్ధి చేస్తాయి కదా అని, మనం ఈ గింజలను తీసుకుంటే శరీరంలోని ప్లాస్టిక్ కూడా క్లీన్ అయిపోతుందని చాలామంది పొరపడుతున్నారు. అయితే, దీనిపై నిపుణులు స్పష్టమైన వివరణ ఇచ్చారు. ఇక నీటిలో ప్లాస్టిక్ను పట్టుకోవడం వేరు, మన శరీరంలోకి వెళ్లిన తర్వాత రక్తంలోనో, కణజాలాల్లోనో పేరుకుపోయిన ప్లాస్టిక్ను బయటకు పంపడం వేరు. దీనికి సంబంధించి ఇప్పటివరకు ఎలాంటి శాస్త్రీయ ఆధారాలు లేవు.
జీర్ణక్రియకు మేలు.. కానీ మ్యాజిక్ కాదు: చింతపండులో ఫైబర్ (పీచు పదార్థం) చాలా ఎక్కువగా ఉంటుంది. ఇది మనం తిన్న ఆహారం త్వరగా అరగడానికి, మలబద్ధకం వంటి సమస్యలు తగ్గడానికి బాగా ఉపయోగపడుతుంది. ఇక జీర్ణవ్యవస్థను క్లీన్ చేయడంలో చింతపండు పాత్ర ఉన్న మాట నిజమే కానీ, ఇది లోపల ఉన్న ప్లాస్టిక్ను కరిగించేస్తుందని భావించడం కేవలం అపోహ మాత్రమేనని వైద్యులు హెచ్చరిస్తున్నారు.
సోషల్ మీడియా ప్రచారాలతో జాగ్రత్త: సోషల్ మీడియాలో వచ్చే అరకొర సమాచారాన్ని నమ్మి చింతపండు గింజల పొడిని అతిగా వాడటం ప్రమాదకరం. చింతపండు గింజల టెక్నాలజీ అనేది కేవలం వాటర్ ప్యూరిఫికేషన్ ప్లాంట్స్ కోసం పరిశీలిస్తున్న అంశం మాత్రమే. ఇది ఇక మనిషి శరీరానికి లోపల ఎలా పనిచేస్తుంది అనే దానిపై ఇంకా పూర్తిస్థాయిలో క్లినికల్ ట్రయల్స్ జరగలేదు. కాబట్టి వీటిని “ప్లాస్టిక్ కిల్లర్” గా భావించి సొంత వైద్యం చేసుకోకూడదు.
చింతపండు గింజలు నీటిలోని మైక్రోప్లాస్టిక్స్ను తొలగించగలవనేది విజ్ఞాన శాస్త్రంలో ఒక గొప్ప ముందడుగు. కానీ అది మన ఆరోగ్యానికి నేరుగా సంబంధం ఉన్న చికిత్స కాదు. మన బాడీలోని ప్లాస్టిక్ను వదిలించుకోవాలంటే ప్లాస్టిక్ బాటిల్స్ వాడకం తగ్గించడం, వేడి ఆహారాన్ని ప్లాస్టిక్ డబ్బాల్లో పెట్టుకోకపోవడమే సరైన మార్గం.
గమనిక: పైన ఇచ్చిన సమాచారం కేవలం అవగాహన కోసం మాత్రమే. ఏదైనా కొత్త ఆరోగ్య సూత్రాలను పాటించే ముందు తప్పనిసరిగా డాక్టర్లను సంప్రదించండి.
