నేటి ఆధునిక కాలంలో కూడా సమాజాన్ని పట్టి పీడిస్తున్న అతిపెద్ద మహమ్మారి ‘వరకట్నం’. చదువు పెరిగినా, టెక్నాలజీ మారినా ఆడపిల్లల మీద జరుగుతున్న ఈ దారుణాలు మాత్రం ఆగడం లేదు. తాజాగా నేషనల్ క్రైమ్ రికార్డ్స్ బ్యూరో విడుదల చేసిన 2024 నివేదికలో దేశంలో నమోదైన వరకట్న మరణాల వివరాలు చూస్తే ఎవరికైనా గుండె తరుక్కుపోవాల్సిందే. మన దేశంలో ఏ రాష్ట్రంలో ఈ దారుణాలు ఎక్కువగా ఉన్నాయో తెలిస్తే షాక్ అవుతారు.ఆ వివరాలు చూద్దాం.
దేశవ్యాప్తంగా దడ పుట్టిస్తున్న కేసులు: ఎన్సిఆర్బి నివేదిక ప్రకారం, ఒక్క 2024 సంవత్సరంలోనే భారతదేశం మొత్తం మీద ఏకంగా 5,737 వరకట్న వేధింపుల మరణాలు నమోదయ్యాయి. అంటే రోజుకు ఎంతోమంది ఆడబిడ్డలు కట్నకానుకల రాక్షసత్వానికి బలవుతున్నారన్నమాట.ఇక చట్టాలు ఎన్ని వచ్చినా క్షేత్రస్థాయిలో పరిస్థితి ఎంత ఘోరంగా ఉందో ఈ నంబర్లే మనకు స్పష్టంగా చెప్తున్నాయి.
యూపీ, బిహార్లలోనే సగం దారుణాలు: ఈ మొత్తం కేసుల్లో అందరినీ షాక్కు గురిచేసే విషయం ఏంటంటే.. ఒక్క ఉత్తరప్రదేశ్ (UP) లోనే అత్యధికంగా 2,038 కేసులు నమోదయ్యాయి. దేశంలోని మొత్తం కేసుల్లో దాదాపు మూడో వంతు ఇక్కడే జరిగాయి. ఇక ఆ తర్వాత స్థానంలో 1,078 కేసులతో బిహార్ రెండో స్థానంలో నిలిచింది. ఈ రెండు రాష్ట్రాల్లోనే దేశంలోని సగానికి పైగా వరకట్న మరణాలు సంభవించడం గమనార్హం.
మిగతా రాష్ట్రాల పరిస్థితి ఏంటి?: ఈ జాబితాలో మూడో స్థానంలో మధ్యప్రదేశ్ 450 కేసులతో ఉంది. ఆ తర్వాతి స్థానాల్లో రాజస్థాన్ (386), పశ్చిమ బెంగాల్ (337), జార్ఖండ్ (206), ఒడిశా (200), హర్యానా (177) ఉన్నాయి. ఇక మన తెలుగు రాష్ట్రాల్లో ఒకటైన తెలంగాణలో కూడా 144 కేసులు నమోదు కావడం ఆందోళన కలిగిస్తోంది. మహారాష్ట్ర 143 కేసులతో పదో స్థానంలో నిలిచింది.
ఆడపిల్లలను లక్ష్మీదేవిగా పూజించే మన దేశంలో, కట్నం కోసం వారిని ప్రాణాలతో బలితీసుకోవడం సమాజానికి ఒక తీరని మచ్చ. కేవలం చట్టాల వల్లే కాకుండా కట్నం అడగడం ఒక నేరం అనే స్పృహ యువతలోనూ తల్లిదండ్రుల్లోనూ మారినప్పుడే ఈ ఘోరాలకు అడ్డుకట్ట పడుతుంది. ఆడపిల్లలకు ఆస్తులు కాకుండా ధైర్యాన్ని, చదువును ఇచ్చి ప్రోత్సహించాల్సిన సమయం ఇది.
గమనిక: పైన ఇచ్చిన వివరాలన్నీ నేషనల్ క్రైమ్ రికార్డ్స్ బ్యూరో (NCRB) అధికారికంగా విడుదల చేసిన నివేదిక ఆధారంగా ఇవ్వబడ్డాయి. వరకట్న వేధింపులకు గురవుతున్న మహిళలు తక్షణ సాయం కోసం ప్రభుత్వ హెల్ప్లైన్ నంబర్లను సంప్రదించవచ్చు.
