ఈ రోజుల్లో చాలా మందిని వేధిస్తున్న పెద్ద సమస్య నిద్రలేమి (Insomnia). రాత్రిళ్లు సరిగ్గా నిద్రపట్టకపోవడం వల్ల మరుసటి రోజు ఆఫీస్లోనో, ఇంట్లోనే ఏ పనిపైనా శ్రద్ధ పెట్టలేకపోతుంటారు. మెదడు మొద్దుబారినట్లు అయిపోతుంది. అలాంటి సమయంలో మన బ్రెయిన్ను తట్టి లేపి, వెంటనే అలర్ట్ చేయడంలో బ్లాక్ కాఫీ అద్భుతంగా పనిచేస్తుందని ఆరోగ్య నిపుణులు చెబుతున్నారు.
మెదడును అలర్ట్ చేసే బ్లాక్ కాఫీ: రాత్రి నిద్ర సరిపోనప్పుడు ఉదయాన్నే ఒక కప్పు వేడివేడి బ్లాక్ కాఫీ తాగడం వల్ల మనకు వెంటనే ఎనర్జీ వస్తుంది. బ్లాక్ కాఫీలో ఉండే ‘కెఫీన్’, అలాగే ‘యాంటీఆక్సిడెంట్లు’ మన మెదడును చురుగ్గా మారుస్తాయి. ఇక ఇది మీ ఏకాగ్రతను పెంచి, నిద్రలేమి వల్ల వచ్చే బద్ధకాన్ని, మగతను క్షణాల్లో మాయం చేస్తుంది.
పాలు, చక్కెర కలిపితే లాభం లేదు: చాలా మంది కాఫీ అనగానే పాలు, పంచదార ఎక్కువగా వేసుకుని తాగుతుంటారు. కానీ నిపుణుల ప్రకారం, కాఫీలో పాలు, చక్కెర కలిపితే దాని అసలు ప్రభావం చాలా వరకు తగ్గిపోతుంది. ఇక నిద్రలేమి అలసట నుంచి ఉపశమనం పొందాలంటే ఎలాంటి పాలు, షుగర్ లేకుండా కేవలం ప్యూర్ బ్లాక్ కాఫీ తాగినప్పుడే పూర్తి ఫలితం ఉంటుంది.
ఇతర ముఖ్యమైన పోషకాలు: కేవలం బ్లాక్ కాఫీ మాత్రమే కాదు, నిద్రలేమి వల్ల శరీరం అలసిపోయినప్పుడు కొన్ని రకాల విటమిన్లు కూడా మనకు ఎంతగానో మేలు చేస్తాయి. ఇక ముఖ్యంగా విటమిన్ డి, బి-విటమిన్లు, అలాగే ఒమేగా-3 ఫ్యాటీ యాసిడ్లు ఉన్న ఆహారాలు తీసుకోవడం వల్ల మెదడు కణాలు రీఛార్జ్ అవుతాయి. ఇవి మనల్ని రోజంతా నీరసం రాకుండా కాపాడతాయి.
ఇవన్నీ తాత్కాలికమే సుమా: ఇక్కడ మనం ఒక ముఖ్యమైన విషయాన్ని ఖచ్చితంగా గుర్తుంచుకోవాలి. బ్లాక్ కాఫీ తాగడం లేదా విటమిన్లు తీసుకోవడం వల్ల నిద్రలేమి వల్ల వచ్చే అలసట అప్పటికప్పుడు తగ్గుతుంది కానీ, ఇది శాశ్వత పరిష్కారం కాదు. ఇవన్నీ కేవలం తాత్కాలిక చిట్కాలు మాత్రమే. హాయిగా పడుకునే మంచి నిద్రకు ఇవేవీ ఎప్పటికీ ప్రత్యామ్నాయం కాలేవు.
రాత్రి నిద్ర సరిపోనప్పుడు ఆ రోజంతా నెట్టుకురావడానికి బ్లాక్ కాఫీ ఒక బెస్ట్ ఆప్షన్ లా పనిచేస్తుంది. అయితే దీనిపైనే పూర్తిగా ఆధారపడకుండా, రాత్రి పూట టైమ్కి పడుకోవడం, ప్రశాంతమైన నిద్ర కోసం ప్రయత్నించడం చాలా ముఖ్యం. ఎందుకంటే మన శరీరానికి, మనసుకి నిద్ర ఇచ్చే విశ్రాంతిని ఏ కాఫీ కూడా ఇవ్వలేదు.
గమనిక: ఈ సమాచారం కేవలం మీ అవగాహన కోసం మాత్రమే అందించబడింది. రోజుకు పరిమితికి మించి ఎక్కువ కప్పుల బ్లాక్ కాఫీ తాగడం వల్ల రివర్స్ లో నిద్ర మరింత దూరం అయ్యే ప్రమాదం ఉంది. కాబట్టి దీనిని లిమిట్గా తీసుకోవడం మంచిది.
