ఇల్లు అన్న తర్వాత ప్రతి ఒక్క గదికి ఒక ప్రాధాన్యత ఉంటుంది. అయితే, వాస్తు శాస్త్రం ప్రకారం పూజ గది తర్వాత మనం అత్యంత పవిత్రంగా, ముఖ్యంగా చూసుకోవాల్సిన ప్రదేశం వంటగది. మన ఆరోగ్యాన్ని ఐశ్వర్యాన్ని నిర్ణయించేది కిచెనే అని వాస్తు నిపుణులు చెబుతుంటారు. వంటగదిలో ఏవైనా వాస్తు దోషాలు ఉంటే.. అవి కేవలం డబ్బు సమస్యలనే కాకుండా ఇంట్లోని వారి ప్రశాంతతను కూడా దెబ్బతీస్తాయి. మరి కిచెన్లో ఎలాంటి చిన్న చిన్న మార్పులు చేయడం వల్ల నెగెటివ్ ఎనర్జీని దూరం చేసి, పాజిటివ్ వైబ్స్ పెంచుకోవచ్చో ఇప్పుడు చూద్దాం.
వంటగదికి సరైన దిశ..అగ్ని మూల: ఇంటి నిర్మాణంలో వంటగది ఎప్పుడూ కూడా ‘ఆగ్నేయ దిశ’లోనే ఉండటం అత్యుత్తమం. ఈ దిశను అగ్ని దేవుడి స్థానంగా, అంటే అగ్ని మూలగా పిలుస్తారు. ఇక ఇది ఇంట్లో పాజిటివ్ ఎనర్జీని నింపుతుంది. అలాగే వంట చేసే గ్యాస్ స్టవ్ను కూడా కచ్చితంగా కిచెన్లోని ఆగ్నేయ మూలలోనే అమర్చుకోవాలి. ఇలా చేయడం వల్ల ప్రతికూల శక్తులు ఇంట్లోకి రాకుండా అడ్డుకోవచ్చు.
కిచెన్ గోడల రంగులు.. నలుపు వద్దు: వంటగదిలో వాడే రంగుల విషయంలో చాలా జాగ్రత్తగా ఉండాలి. అగ్నితత్వానికి సరిపోయేలా లేత పసుపు లేదా నారింజ రంగులను వాడటం చాలా మంచిది. ఇక ఇవి వంటగదికి మంచి అందాన్ని, ప్రశాంతతను ఇస్తాయి. అయితే, కిచెన్ గోడలకు లేదా ప్లాట్ఫామ్కు నలుపు రంగును మాత్రం అస్సలు వాడకూడదు. నలుపు రంగు నెగెటివ్ ఎనర్జీని ఆకర్షిస్తుంది, దీనివల్ల ఇంట్లో అనవసరమైన గొడవలు, గందరగోళం వచ్చే ప్రమాదం ఉంది.
సామగ్రి అమరిక.. కబోర్డ్స్ జాగ్రత్త: కిచెన్ లో నిత్యావసరాలు, బియ్యం బస్తాలు లేదా ధాన్యాలు వంటి బరువైన వస్తువులను దక్షిణం లేదా పడమర దిశలో భద్రపరచడం శ్రేయస్కరం. అలాగే, చాలా మంది స్థలం కోసం గ్యాస్ స్టవ్ పైన కబోర్డ్లు లేదా షెల్ఫ్లు పెడుతుంటారు. ఇక వాస్తు ప్రకారం స్టవ్ పైన ఎలాంటి బరువులు ఉండటం మంచిది కాదు. ఎప్పుడైనా సరే వంటగదిని చాలా క్లీన్గా, ఒక క్రమపద్ధతిలో సర్దుకోవడం వల్ల ఇంట్లో లక్ష్మీ కటాక్షం ఉంటుంది.
పెనం గోడకు తగిలిస్తున్నారా?: మనం వంటగదిలో చేసే సాధారణ పొరపాట్లలో ఒకటి ‘చపాతీ పెనం’ లేదా దోశ పెనాన్ని కడిగిన తర్వాత గోడకు తగిలించడం. వాస్తు నియమాల ప్రకారం, పెనాన్ని అలా గోడలకు వేలాడదీయడం అస్సలు మంచిది కాదు. ఇలా చేయడం వల్ల ఇంట్లో ఉన్న ఐశ్వర్యం తగ్గిపోతుందని, తీవ్రమైన ఆర్థిక ఇబ్బందులు ఎదురవుతాయని వాస్తు శాస్త్రం హెచ్చరిస్తోంది. కాబట్టి ఈ అలవాటు ఉంటే వెంటనే మార్చుకోండి.
ఇక వంటగది అనేది కేవలం అన్నం వండుకునే స్థలం మాత్రమే కాదు.. అది ఇంటి ప్రగతిని నిర్ణయించే కేంద్రం. కిచెన్ను ఎప్పుడూ అస్తవ్యస్తంగా ఉంచకుండా, పరిశుభ్రంగా ఉంచుకుంటూ.. ఈ చిన్న చిన్న వాస్తు చిట్కాలను పాటిస్తే చాలు. మీ ఇంట్లోని నెగెటివ్ ఎనర్జీ అంతా దూరమైపోయి, ఆర్థిక స్థిరత్వం, కుటుంబ సభ్యుల మధ్య సానుకూల వాతావరణం పెంపొందుతాయి.
గమనిక: పైన ఇచ్చిన సమాచారం వాస్తు శాస్త్ర నియమాలు మరియు నిపుణుల సూచనల ఆధారంగా సాధారణ అవగాహన కోసం మాత్రమే ఇవ్వబడింది. మీ ఇంటి నిర్మాణంలో లేదా కిచెన్లో పెద్ద మార్పులు చేయాలనుకుంటే, ఒకసారి ప్రముఖ వాస్తు నిపుణులను సంప్రదించి సరైన నిర్ణయం తీసుకోవడం మంచిది.
