భారతదేశంలో విభిన్న రకాల వైరస్లు, బ్యాక్టీరియా ఇన్ఫెక్షన్ల వార్తలకు కేరళ రాష్ట్రం తరచూ కేరాఫ్ అడ్రస్గా మారుతోంది. ఇప్పటికే నిపా, కలరా వంటి ప్రమాదకర వ్యాధులతో పోరాడుతున్న కేరళ ప్రజలను.. ఇప్పుడు ‘షిగెల్లా’ అనే మరో కొత్త ఇన్ఫెక్షన్ వణికిస్తోంది. కేరళలోని కోజికోడ్ జిల్లాలో ఈ వ్యాప్తి తీవ్ర ఆందోళన కలిగిస్తోంది. ఒక చిన్న బాలుడు ఈ వ్యాధి బారిన పడటంతో అసలు ఈ సమస్య ఎందుకు వస్తోంది, దీని వెనుక ఉన్న కారణాలేంటో ఇప్పుడు చూద్దాం.
కేరళలో పెరిగిపోతున్న షిగెల్లా కేసులు: కేరళలోని కోజికోడ్ జిల్లా పయ్యోలి పట్టణంలో నివసించే ఒక 9 ఏళ్ల బాలుడికి తాజాగా షిగెల్లా పాజిటివ్గా నిర్ధారణ అయింది. ఈ ఒక్క కేసుతో జూన్ నెలలోనే నమోదైన మొత్తం షిగెల్లా కేసుల సంఖ్య 12కు చేరుకుంది. ఇక చిన్న పిల్లలపై ఈ బ్యాక్టీరియా ప్రభావం ఎక్కువగా చూపిస్తుండటంతో స్థానిక ప్రజలు మరియు తల్లిదండ్రులు తీవ్ర భయాందోళనలకు గురవుతున్నారు.
నీటి కాలుష్యమే ప్రధాన కారణమా?: ఆరోగ్య నిపుణుల ప్రకారం.. షిగెల్లా అనేది ఒక రకమైన బ్యాక్టీరియా ఇన్ఫెక్షన్. ఇది వ్యాపించడానికి ప్రధాన కారణం కలుషితమైన నీరు మరియు ఆహారం. ముఖ్యంగా వర్షాకాలం ప్రారంభంలో తాగునీటి వనరులు కలుషితం కావడం వల్ల ఈ బ్యాక్టీరియా వేగంగా విస్తరిస్తుంది. ఇక శుభ్రంగా లేని నీటిని తాగడం ద్వారా, లేదా ఆ నీటితో వండిన ఆహారాన్ని తినడం వల్ల ఇది నేరుగా మనుషుల జీర్ణవ్యవస్థపై దాడి చేస్తుంది.
అప్రమత్తమైన ఆరోగ్య శాఖ..కఠిన చర్యలు: ఇప్పటికే అక్కడ నిపా వైరస్, కలరా ముప్పులు ఉండటంతో.. కేరళ ఆరోగ్య శాఖ అధికారులు ఈ షిగెల్లా వ్యాప్తిపై చాలా సీరియస్గా ఫోకస్ పెట్టారు. వ్యాధి మరింత మందికి పాకకుండా ఉండటానికి బావులు, తాగునీటి ట్యాంకులలో ‘వాటర్ క్లోరినేషన్’ ప్రక్రియను ముమ్మరం చేశారు. అలాగే ప్రజలందరూ కాచి చల్లార్చిన నీటినే తాగాలని మైకుల ద్వారా, సోషల్ మీడియా ద్వారా అవగాహన కల్పిస్తున్నారు.
ఏదైనా ఇన్ఫెక్షన్ మన దరిచేరకుండా ఉండాలి అంటే వ్యక్తిగత పరిశుభ్రత మరియు పరిసరాల పరిశుభ్రత చాలా ముఖ్యం. కేరళలో షిగెల్లా కలకలం రేపుతున్న నేపథ్యంలో.. ఆహారం తినే ముందు చేతులను శుభ్రంగా కడుక్కోవడం, బయటి ఫుడ్కు దూరంగా ఉండటం, వడపోసిన లేదా వేడి చేసిన నీటిని తాగడం వంటి చిన్న చిన్న జాగ్రత్తలతో ఈ వ్యాధి బారిన పడకుండా మనల్ని మనం కాపాడుకోవచ్చు.
 బ్యాక్టీరియా కలకలం రేపుతోంది. కోజికోడ్ జిల్లాలో 9 ఏళ్ల బాలుడికి ఈ ఇన్ఫెక్షన్ సోకడంతో కేసుల సంఖ్య 12కు చేరింది.){kind=link}