హిందూ సంప్రదాయంలో వారంలోని ప్రతి రోజుకూ ఒక ప్రత్యేకత ఉంది. అలాగే మంగళవారం అనగానే మనకు గుర్తొచ్చేది ఆంజనేయస్వామి. ధైర్యానికి, భక్తికి నిలువెత్తు రూపమైన హనుమంతుడికి ఈ రోజు ఎంతో ప్రీతికరమైనది. అయితే, ఈ రోజు మనకు తెలియకుండానే కొన్ని తప్పులు చేస్తుంటాం. వాటి వల్ల ఇంట్లో సమస్యలు, ఆర్థిక ఇబ్బందులు పెరిగే అవకాశం ఉందట. మరి మంగళవారం నాడు పొరపాటున కూడా చేయకూడని పనులు ఏమిటో ఇప్పుడు వివరంగా చూద్దాం..
అప్పులు ఇవ్వడం, తీసుకోవడం వద్దు: మంగళవారం నాడు పొరపాటున కూడా ఎవరికీ డబ్బులు అప్పుగా ఇవ్వకూడదు. ఈ రోజు ఎవరికైనా ధనాన్ని ఇస్తే అది తిరిగి వచ్చే అవకాశాలు చాలా తక్కువగా ఉంటాయట. అలాగే ఈ రోజు కొత్తగా అప్పులు చేయడం కూడా మంచిది కాదు. ఆర్థిక ఇబ్బందుల నుంచి దూరంగా ఉండాలంటే ఈ రోజు డబ్బు లావాదేవీలకు కాస్త దూరంగా ఉండటమే బెటర్.
ఇనుప వస్తువులు కొనకండి: ఈ రోజు మార్కెట్కు వెళ్లినప్పుడు ఇనుము లేదా ఉక్కుతో చేసిన వస్తువులను అస్సలు కొనకూడదు. ముఖ్యంగా కత్తులు, కత్తెరలు, సూదులు వంటి పదునైన వస్తువులను మంగళవారం నాడు ఇంటికి తీసుకురావడం అశుభంగా భావిస్తారు. జ్యోతిష్య శాస్త్రం ప్రకారం ఈ రోజు శుక్ర, శని గ్రహాలకు సంబంధించిన పనులకు దూరంగా ఉండాలి.
ఈ దిక్కుల్లో ప్రయాణాలు వద్దు: మంగళవారం నాడు దూర ప్రయాణాలు చేసే వారు దిక్కులను చూసుకోవడం ముఖ్యం. ముఖ్యంగా ఉత్తరం, పడమర దిక్కుల్లో ఈ రోజు ప్రయాణించకూడదని పెద్దలు చెబుతారు. ఇక ఒకవేళ తప్పనిసరి పరిస్థితుల్లో ఈ దిక్కుల వైపు వెళ్తే కొన్ని ఇబ్బందులు లేదా ఆటంకాలు ఎదురయ్యే ప్రమాదం ఉంది.
కోపానికి దూరంగా, ప్రశాంతంగా: మంగళవారం నాడు మనసును ప్రశాంతంగా ఉంచుకోవాలి. ఎవరిపై కోపపడటం, గొడవలకు దిగడం చేయకూడదు. హనుమంతుడు శాంత ప్రియుడు. కాబట్టి ఈ రోజు ఇంట్లో ప్రశాంత వాతావరణం ఉంటేనే స్వామి వారి అనుగ్రహం లభిస్తుంది. ఇక మనసులో కూడా ఎవరికీ కీడు తలపెట్టకూడదు.
మద్యం, మాంసాహారానికి నో చెప్పండి: హనుమంతుడిని పూజించే ఈ పవిత్రమైన రోజున మాంసాహారం తినడం, మద్యపానం చేయడం వంటి పనులకు పూర్తిగా దూరంగా ఉండాలి. వీటితో పాటు స్వామి వారికి నైవేద్యం సమర్పించేటప్పుడు పాలతో చేసిన మిఠాయిలను పెట్టకూడదు. ఇక ఈ రోజు బ్రహ్మచర్యం పాటించడం ఎంతో మంచిది.
జుట్టు, గోళ్లు కత్తిరించవద్దు: చాలా మంది సెలవు రోజుల్లోనో లేదా ఖాళీగా ఉన్నప్పుడో గోళ్లు, జుట్టు కత్తిరించుకుంటారు. కానీ మంగళవారం నాడు జుట్టు కత్తిరించడం, షేవింగ్ చేసుకోవడం, గోళ్లు తీయడం వంటివి అస్సలు చేయకూడదు. ఇక ఇలా చేయడం వల్ల హనుమంతుడి ఆగ్రహానికి గురికావాల్సి వస్తుందని నమ్ముతారు. అలాగే ఈ రోజు ఉపవాసం ఉండేవారు సాధారణ ఉప్పును కానీ, రాతి ఉప్పును కానీ తీసుకోకూడదు.
మంగళవారం నాడు హనుమంతుడిని మనస్ఫూర్తిగా పూజిస్తే ఎలాంటి కష్టాలైనా తొలగిపోతాయి. అయితే పైన చెప్పుకున్న పనులను చేయకుండా జాగ్రత్త పడితే స్వామి వారి కటాక్షం మనపై ఎల్లప్పుడూ ఉంటుంది. కాబట్టి తెలియక చేసే తప్పులను సరిదిద్దుకుని, ఆంజనేయస్వామి ఆశీస్సులు పొందుదాం.
గమనిక: పైన ఇచ్చిన విషయాలు కేవలం హిందూ మత విశ్వాసాలు, జ్యోతిష్య శాస్త్ర నమ్మకాల ఆధారంగా సేకరించినవి మాత్రమే. దీనిని అవగాహన కోసం మాత్రమే అందించడం జరిగింది.
