హిందూ సంప్రదాయంలో ఎన్నో పవిత్రమైన రోజులు ఉన్నాయి. వాటిలో అత్యంత విశిష్టమైనది, మహిమాన్వితమైనది ‘రామలక్ష్మణ ద్వాదశి’. జ్యేష్ఠ మాసం శుక్ల పక్షంలో వచ్చే ఈ రోజున శ్రీరాముడిని, లక్ష్మణుడిని భక్తితో కొలిస్తే అనుకున్న కోరికలన్నీ నెరవేరుతాయని భక్తుల నమ్మకం. ముఖ్యంగా సంతానం లేనివారికి ఈ రోజు(జూన్ 26) ఒక గొప్ప వరం లాంటిది. మరి ఈ పర్వదినం వెనుక ఉన్న కథ ఏంటి? ఈ రోజు మనం ఏం చేయాలో సరళంగా తెలుసుకుందాం.
దశరథ మహారాజు ఆచరించిన వ్రతం: ఈ పండుగకు ఒక గొప్ప చరిత్ర ఉంది. మనకు రామాయణం తెలుసు కదా, దశరథ మహారాజుకు చాలా కాలం పాటు పిల్లలు కలగలేదు. ఇక అప్పుడు ఆయన సకల గుణ సంపన్నులైన సంతానం కోసం ఈ ద్వాదశి వ్రతాన్ని అత్యంత నిష్ఠతో ఆచరించారని వరాహ పురాణం చెబుతోంది. ఆ తర్వాతే ఆయనకు శ్రీరాముడు, లక్ష్మణుడు, భరత, శత్రుఘ్నులు జన్మించారు.
సంతాన ప్రాప్తి కోసం విశేషం: సంతానం లేక బాధపడే దంపతులకు ఈ రోజు ఎంతో కీలకం. రామలక్ష్మణ ద్వాదశి నాడు పూజలు చేసి, ఉపవాసం ఉంటే శ్రీరాముడి లాంటి మంచి గుణాలు ఉన్న పిల్లలు పుడతారని భక్తులు ప్రగాఢంగా నమ్ముతారు. ఇక ఇంట్లో పిల్లల ఆరోగ్యం, వారి భవిష్యత్తు బాగుండాలని కూడా తల్లులు ఈ వ్రతాన్ని చేస్తుంటారు.
పాపాలు తొలగి ముక్తి లభిస్తుంది: కేవలం సంతానమే కాదు, ఈ రోజు స్వామివారిని పూజించడం వల్ల మనం తెలిసి తెలియక చేసిన పాపాలన్నీ తొలగిపోతాయి. జీవితంలో ప్రశాంతత లభిస్తుంది. విష్ణుమూర్తి అనుగ్రహంతో మరణానంతరం మోక్షం సిద్ధిస్తుందని పురాణాలు చెబుతున్నాయి. అలాగే ఈ రోజు విష్ణువుకు ఇష్టమైన తులసి పూజ చేయడం వల్ల ఇంట్లో లక్ష్మీదేవి తాండవిస్తుంది.
సులువైన పూజా విధానం: ఈ రోజు ఉదయాన్నే లేచి, తలస్నానం చేసి ఇల్లంతా శుభ్రం చేసుకోవాలి. పూజా మందిరంలో ఒక కలశాన్ని ఏర్పాటు చేసుకుని, దానిపై శ్రీరాముడు, లక్ష్మణుడి విగ్రహాలు లేదా ఫోటోలు ఉంచి పువ్వులతో అలంకరించాలి. ఇక దీపధూప నైవేద్యాలు సమర్పించాలి. ఇక సాయంత్రం పూజ చేసేవాళ్ళు పూజ చేసుకొని రామాయణం చదవడం లేదా వినడం చాలా మంచిది.
రామలక్ష్మణ ద్వాదశి అనేది కేవలం ఒక పండుగ మాత్రమే కాదు, కుటుంబంలో సంతోషాన్ని, మంచి సంతానాన్ని ఇచ్చే ఒక దివ్యమైన రోజు. మనస్ఫూర్తిగా ఆ రామయ్యను, లక్ష్మణుడిని స్మరిస్తూ ఈ రోజును భక్తిశ్రద్ధలతో జరుపుకుందాం.
గమనిక: ఇక్కడ ఇచ్చిన సమాచారం పురాణాలు, నమ్మకాలపై ఆధారపడి ఉంది. ఉపవాసాలు ఉండేటప్పుడు మీ ఆరోగ్యాన్ని బట్టి నిర్ణయం తీసుకోగలరు.
