ఈ రోజుల్లో సరైన భాగస్వామిని చూసి పెళ్లి చేయడం అనేది తల్లిదండ్రులకు ఒక పెద్ద టాస్క్లా మారిపోయింది. మరోవైపు చాలా మంది యువత పెళ్లి పేరు ఎత్తితేనే భయంతోనో ఆసక్తి లేకో తప్పించుకుంటున్నారు. దీనిపై చౌదరి చరణ్ సింగ్ యూనివర్సిటీ పరిశోధనలు కూడా చేస్తోంది. ఇలాంటి తరుణంలో ఎక్స్ (ట్విట్టర్) వేదికగా ఒక యువతి తనకు కాబోయే భర్తకు విధించిన కఠినమైన రూల్స్ లిస్ట్ చూసి నెటిజన్లు అవాక్కవుతున్నారు. “ఇలాంటి వాడు భూమ్మీద దొరకడు.. వేరే గ్రహంలో వెతుక్కోవాల్సిందే” అంటూ ఈ 11 షరతులపై సోషల్ మీడియాలో పెద్ద డిబేట్ నడుస్తోంది. ఆ విశేషాలు చూద్దాం..
ఆదాయం, అందం మరియు ఎత్తు: కాబోయే భర్త నెలకు కనీసం 2 లక్షల రూపాయలు సంపాదించాలని ఆ యువతి కండిషన్ పెట్టింది. ఇక దాంతో పాటు అతను సహజంగానే చాలా అందంగా ఉండాలని, ఖచ్చితంగా 6 అడుగుల ఎత్తు ఉండాలని స్పష్టం చేసింది. అంతేకాదు, పెళ్లి సమయానికి అతను వర్జిన్ అయి ఉండాలనేది ఆమె మొదటి రూల్.
వంట రావాలి.. గౌరవం ఇవ్వాలి: మహిళలను గౌరవించే మనస్తత్వం ఉన్నవాడై ఉండాలని చెబుతూనే అతనికి వంట చేయడం తప్పనిసరిగా వచ్చి ఉండాలని మరో షరతు విధించింది. ఇక భార్యను బాగా చూసుకోవడంతో పాటు ఇల్లాలు చేసే పనుల్లో కూడా భాగస్వామి కావాలనేది ఆమె ఆలోచన కావచ్చు.
నో సోషల్ మీడియా.. నో గర్ల్ ఫ్రెండ్స్: ఈ రోజుల్లో ప్రతి ఒక్కరూ ఫోన్లకు అతుక్కుపోతున్నారు. కానీ ఆ యువతి పెట్టిన కండిషన్ ప్రకారం భర్త అస్సలు సోషల్ మీడియా వాడకూడదు. అలాగే అతనికి ఎలాంటి మహిళా స్నేహితులు కూడా ఉండకూడదని గట్టి రూల్ పెట్టింది.
పర్మిషన్ ఉండాలి.. లొకేషన్ షేర్ చేయాలి: అన్నిటికంటే నెటిజన్లను షాక్కు గురిచేసిన రూల్స్ ఇవే. ఇక భర్త ఎక్కడికి వెళ్లాలన్నా ముందుగా భార్య పర్మిషన్ అడగాలి. అంతేకాదు, రోజులో 24 గంటల పాటు తన లైవ్ లోకేషన్ను భార్యకు షేర్ చేస్తూనే ఉండాలి. చివరిగా తనను తరచూ ఫారిన్ ట్రిప్పులకు తీసుకువెళ్లాలని కూడా కోరింది.
ఇక ఈ షరతులన్నీ పెట్టిన సదరు యువతి, చివర్లో ఇలాంటి అబ్బాయి నాకు ఎక్కడ దొరుకుతాడు? అని అమాయకంగా ప్రశ్నించింది. భాగస్వామిపై అంచనాలు ఉండటం తప్పు కాదు కానీ, ఒకరి స్వేచ్ఛను పూర్తిగా హరించేలా అగ్రిమెంట్లు ఉంటే పెళ్లి బంధం నిలవడం కష్టమని అందుకే యువత పెళ్లికి దూరమవుతున్నారంటూ నెటిజన్లు కామెంట్లు చేస్తున్నారు.
