మన చేతిలో స్మార్ట్ఫోన్, అందులో వాట్సాప్ ఉంటే చాలు.. రకరకాల మెసేజ్లు వచ్చి పడుతుంటాయి. అయితే, ప్రస్తుతం వాట్సాప్లో ఉచిత ఆఫర్ల పేరుతో పెద్ద ఎత్తున సైబర్ మోసాలు జరుగుతున్నాయి. ముఖ్యంగా టెలికాం కంపెనీల పేరుతో వస్తున్న నకిలీ లింక్స్ పట్ల సైబర్ నిపుణులు తీవ్రంగా హెచ్చరిస్తున్నారు. మీరు ఏ సిమ్ వాడుతున్నా సరే ఒక్క చిన్న లింక్ క్లిక్ చేస్తే మీ అకౌంట్ ఖాళీ అవ్వడమే కాకుండా, మీ వ్యక్తిగత సమాచారం అంతా దొంగల చేతికి చిక్కుతుంది. ఆ వివరాలు ఇవే..
‘ఎయిర్టెల్ గ్రోత్’ పేరుతో కొత్త వల: ప్రస్తుతం వాట్సాప్లో ‘ఎయిర్టెల్ గ్రోత్’ అనే పేరుతో ఒక మెసేజ్ తెగ వైరల్ అవుతోంది. అందులో యూజర్లందరికీ 100 GB క్లౌడ్ స్టోరేజ్ ఉచితంగా ఇస్తున్నామంటూ ఆశ పెడుతున్నారు. ఇక దీనిని నిజమని నమ్మి చాలామంది ఆ లింకులపై క్లిక్ చేసి మోసపోతున్నారు. ఇది కేవలం ఎయిర్టెల్ యూజర్లకే కాదు, జియో, ఐడియా, లాంటి ఏ సిమ్ వాడుతున్న వారికైనా ఇలాంటి మెసేజ్లు రావచ్చు.
డేటా మరియు బ్యాంక్ అకౌంట్లు ఖాళీ: ఈ నకిలీ లింక్లపై క్లిక్ చేయగానే అవి మిమ్మల్ని వేరే వెబ్సైట్లకు తీసుకెళ్తాయి. అక్కడ మీ పేరు, ఫోన్ నంబర్, పాస్వర్డ్లు లేదా బ్యాంకింగ్ వివరాలను అడుగుతాయి. ఇక ఆ సమాచారాన్ని ఎంటర్ చేశారా.. ఇక అంతే సంగతులు మీ ప్రైవేట్ డేటా మొత్తం సైబర్ నేరగాళ్ల చేతుల్లోకి వెళ్ళిపోతుంది. దీని ద్వారా మీ బ్యాంక్ అకౌంట్లను కూడా వారు ఈజీగా హ్యాక్ చేసే ప్రమాదం ఉంది.
అసలైన లింకును ఎలా గుర్తించాలి?: ఎయిర్టెల్ అధికారిక వెబ్సైట్ ఎప్పుడూ ‘airtel.in’ అనే డొమైన్తోనే ఉంటుంది. అలా కాకుండా వింత వింత అక్షరాలతో ఉండే చిన్న లింకులు (షార్ట్నర్ లింక్స్) మెసేజ్లో కనిపిస్తే అవి నకిలీవని గ్రహించాలి. ఇక ఎలాంటి కంపెనీ అయినా సరే, వందల జీబీ డేటాను లేదా స్టోరేజ్ను వాట్సాప్ లింకుల ద్వారా ఉచితంగా పంచవు అనే విషయాన్ని గుర్తుంచుకోవాలి.
జాగ్రత్త పడటం ఎలా?: మీకు వాట్సాప్లో ఇలాంటి ఉచిత ఆఫర్ల మెసేజ్లు వస్తే, ఆ లింక్లను అస్సలు క్లిక్ చేయొద్దు. అలాగే వాటిని మీ స్నేహితులకు, గ్రూపులకు ఫార్వర్డ్ చేయకండి. ఇక ఒకవేళ నిజంగానే కంపెనీ ఏదైనా ఆఫర్ ఇచ్చిందా లేదా అని తెలుసుకోవాలనుకుంటే.. నేరుగా ఆ సిమ్ కంపెనీకి చెందిన అధికారిక వెబ్సైట్ లేదా అఫీషియల్ మొబైల్ యాప్లోకి వెళ్లి మాత్రమే చెక్ చేసుకోవాలి.
ఇక సైబర్ నేరగాళ్లు మన ఆశను ఆసరాగా చేసుకుని మోసాలకు తెగబడుతున్నారు. “ఉచితం” అనే మాటకు ఆకర్షితులై మన జీవితాంతం కష్టపడి దాచుకున్న డబ్బును వ్యక్తిగత ప్రైవసీని పణంగా పెట్టకూడదు. వాట్సాప్లో వచ్చే ప్రతి మెసేజ్ను అనుమానించడం జాగ్రత్తగా ఉండటమే డిజిటల్ ప్రపంచంలో మనల్ని కాపాడుతుంది.
గమనిక: మీకు తెలియని నంబర్ల నుండి వచ్చే అనుమానాస్పద లింకులను క్లిక్ చేయకుండా వెంటనే డిలీట్ చేయడం లేదా ఆ నంబర్ను బ్లాక్ చేయడం సురక్షితమైన పద్ధతి.
