రోజుకు ఎనిమిది గ్లాసుల నీళ్లు తాగితేనే శరీరం డిటాక్స్ అవుతుందా? సోషల్ మీడియాలో వచ్చే వార్తలు చూసి లీటర్లకు లీటర్లు నీళ్లు తాగేస్తున్నారా? అయితే మీరు ప్రమాదంలో పడినట్లే! అవసరానికి మించి నీళ్లు తాగడం వల్ల ప్రయోజనం కంటే నష్టమే ఎక్కువని వైద్యులు హెచ్చరిస్తున్నారు. అసలు రోజుకు ఎన్ని నీళ్లు తాగాలి? అతిగా తాగితే ఏమవుతుంది? సోషల్ మీడియా ప్రచారంలో నిజమెంతో నిపుణుల మాటల్లో తెలుసుకుందాం.
సోషల్ మీడియా ప్రచారం.. నిజమెంత?: రోజుకు కచ్చితంగా ఎనిమిది గ్లాసుల నీళ్లు నిర్దిష్ట సమయాల్లోనే తాగాలని, అలా చేస్తేనే శరీరం శుభ్రపడుతుంది అని సోషల్ మీడియాలో విపరీతంగా ప్రచారం జరుగుతోంది. కానీ ఈ మాటకు ఎలాంటి శాస్త్రీయ ఆధారాలు లేవని వైద్యులు తెల్చి చెబుతున్నారు. నీళ్లు తాగే సమయం కంటే, రోజంతా శరీరానికి సరిపడా ద్రవాలు అందుతున్నాయా లేదా అన్నదే ముఖ్యమని సూచిస్తున్నారు.
అతిగా తాగితే ప్రాణానికే ప్రమాదం: శరీరానికి అవసరమైన దానికంటే ఎక్కువ నీరు తాగడం వల్ల రక్తంలో సోడియం స్థాయిలు ఒక్కసారిగా పడిపోతాయి. దీనివల్ల ‘హైపోనాట్రేమియా’ లేదా ‘వాటర్ ఇంటాక్సికేషన్’ అనే తీవ్రమైన ఆరోగ్య సమస్య వస్తుంది. ఇది కొన్నిసార్లు ప్రాణాంతకంగా కూడా మారవచ్చు. అందుకే ఏదైనా హద్దుల్లో ఉన్నప్పుడే ఆరోగ్యానికి మంచిది.
దాహమే సరైన ప్రమాణం: ప్రతి ఒక్కరూ రోజుకు ఇన్ని లీటర్ల నీళ్లు కచ్చితంగా తాగాలనే నియమమేదీ లేదు. మన శరీరం ఎప్పుడు నీళ్లు కావాలో దాహం రూపంలో సంకేతం ఇస్తుంది. ఇక శరీరం అడిగినప్పుడు, దాహం వేసినప్పుడు మాత్రమే నీరు తాగడం చాలా మంచి అలవాటు.
మీరు సరిగ్గా నీళ్లు తాగుతున్నారా?: మీరు తగినంత నీరు తాగుతున్నారో లేదో తెలుసుకోవడానికి ఒక చిన్న చిట్కా ఉంది. మీ మూత్రం రంగును గమనించండి. మూత్రం లేత పసుపు రంగులో ఉంటే మీ శరీరం సరిగ్గా హైడ్రేట్ అయి ఉన్నట్లే లెక్క. ఇక అలా కాకుండా ముదురు రంగులో ఉంటే నీళ్లు తక్కువగా తాగుతున్నారని అర్థం.
ఇక ఉదయాన్నే లేవగానే కాస్త నీళ్లు తాగడం వల్ల జీర్ణక్రియ మెరుగుపడటం మంచి అలవాటే. కానీ సోషల్ మీడియాలో వచ్చే ప్రతి విషయాన్ని గుడ్డిగా నమ్మేసి అతిగా నీళ్లు తాగడం సరికాదు. ప్రచారాలను ఆచితూచి నమ్మి, మీ శరీర తత్వానికి తగినట్లుగా నడుచుకోవడమే అసలైన ఆరోగ్యం.
గమనిక: మీకు ఏవైనా తీవ్రమైన ఆరోగ్య సమస్యలు లేదా కిడ్నీ సంబంధిత ఇబ్బందులు ఉంటే, రోజుకు ఎంత ప్రమాణంలో నీళ్లు తాగాలనేది తప్పకుండా మీ వ్యక్తిగత వైద్యుడిని అడిగి తెలుసుకోవడం మంచిది.
