కల్తీ ఆహార పదార్థాలపై మహారాష్ట్ర ప్రభుత్వం విరుచుకుపడింది. నకిలీ పాల ఉత్పత్తులను అరికట్టేందుకు ‘అనలాగ్ పనీర్’ లేదా ‘నాన్-డెయిరీ పనీర్’ తయారీ, విక్రయాలపై ఏడాది పాటు నిషేధం విధిస్తూ సంచలన నిర్ణయం తీసుకుంది. ఈ నిబంధనలను ఉల్లంఘిస్తే ఆరు నెలల జైలు శిక్ష, రూ.లక్ష జరిమానా తప్పవు. అసలు ఈ అనలాగ్ పనీర్ అంటే ఏంటి, దీనివల్ల వచ్చే ప్రమాదాలేంటి, అసలైన పనీర్ను ఎలా గుర్తించాలో ఇప్పుడు తెలుసుకుందాం..
అసలేంటీ అనలాగ్ పనీర్? :సాధారణ పనీర్ను తాజా పాలను విరిచి తయారుచేస్తారు. కానీ అనలాగ్ పనీర్లో అసలు పాలే వాడరు! పామాయిల్, పాలపొడి, మిల్క్ సాలిడ్స్, స్టార్చ్, ఎమల్సిఫైయర్లు వంటి రసాయనాలు కలిపి తయారుచేస్తారు. ఇక ఇది చూడటానికి, రుచికి అసలైన పనీర్లాగే ఉంటూ సగం ధరకే లభిస్తుంది. ఇప్పటికే ఛత్తీస్గఢ్ తర్వాత ఈ కృత్రిమ పనీర్పై నిషేధం విధించిన రెండో రాష్ట్రంగా మహారాష్ట్ర నిలిచింది.
అసలైన పనీర్ను గుర్తించడం ఎలా?: మనం తెచ్చుకున్న పన్నీర్ రంగు, వాసన తో తెలుసుకోవచ్చు అది నకిలీనా కదా అని, పనీర్ ముదురు పసుపు రంగులో ఉంటే కల్తీ అని అనుమానించాలి. ఇక స్వచ్ఛమైన పనీర్ కొద్దిగా పాల మిఠాయి వాసన వస్తుంది. పుల్లటి వాసన వస్తే అది నకిలీది.
స్పర్శ: మనం పనీర్ ముక్కను నలిపినప్పుడు రబ్బర్లా సాగితే అది అనలాగ్ పనీర్ అని అర్ధం.
నీటి పరీక్ష & వేడి చేయడం: పనీర్ ముక్కను నీళ్ల గ్లాసులో వేస్తే కల్తీది వెంటనే కరిగిపోతుంది. పెనంపై వేడి చేసినప్పుడు నకిలీ పనీర్ కరిగిపోయి ఎక్కువ నీటిని బయటకు వదులుతుంది.
ఇక తక్కువ ధరకు వస్తుందని నకిలీ పనీర్ కొని ఆరోగ్యాలను పాడుచేసుకోవద్దు. నమ్మకమైన డెయిరీలు, గుర్తింపు పొందిన ప్యాకెట్ పనీర్ను మాత్రమే కొనుగోలు చేయడం మంచిది. ప్యాకెట్పై ఉండే పదార్థాల వివరాలను చదివి అప్రమత్తంగా ఉండండి.
