హనుమాన్‌.. అంటే చాలు ధైర్యసాహసాలకు ప్రతీక, భక్తికి నిలువెత్తు సాక్ష్యం. దుష్టశక్తుల నివారణకు, భయాది రోగ, ఈతి బాధల నివారణకు ఆంజనేయస్వామిని అందరూ ఆరాధిస్తారు. దేశంలో హనుమాన్‌ గుడి లేని ఊరు ఉండదంటే అతిశయోక్తి కాదేమో. అయితే ప్రతి దేవతామూర్తిని శాస్త్రంలో చెప్పిన పద్ధతుల్లో పూజిస్తే ఫలితాలు వెంటనే వస్తాయనేది లోకవిదితమే. అంజనేయస్వామిని వేటితో పూజించాలి, ఏ మంత్రాలు, ఏ తిథులు, వారాలు ఆయనకు సంబంధించినవో తెలుసుకుందాం…
ప్రతిరోజు పఠించాల్సిన శ్లోకం:
ప్రభాకరాత్మజాం సుమేరు చారువర్ణ శోబితాం
విరాజమాన పంకజద్వయాత్తహస్తవైభవాం
ధరాత్మజాపతి ప్రసాదప్రాప్త ధన్యజీవితాం
నమామితాంవరప్రదాంరమాకళాం సువర్చలాం!!
ఇలా స్వామిని నిత్యం ధాన్యం చేయాలి.
ఆయా మాసాల్లో కింది నక్షత్రాల్లో హనుమాన్‌ను పూజించాలి.
చైత్రమాసం – పుష్యమీ నక్షత్రం
వైశాఖమాసం – ఆశ్లేషా నక్షత్రం
వైశాఖమాసం – కృష్ణపక్ష దశమీ హనుమజ్జయంతి
జ్యెష్ఠమాసం – మఘ నక్షత్రం
జ్యెష్ఠశుద్ధ విదియ – దశమి దినములు
ఆషాఢ మాసం – రోహిణి నక్షత్రం
శ్రావణ మాసం – పూర్ణిమ
భాద్రపద మాసం – అశ్వనీ నక్షత్రం
ఆశ్వీయుజ మాసం – మృగశీర్షా నక్షత్రం
కార్తీక మాసం – ద్వాదశి
మార్గశీర్ష మాసం – శుద్ధ త్రయోదశి
పుష్య మాసం – ఉత్తరా నక్షత్రం
మాఘ మాసం – ఆర్ధ్రా నక్షత్రం
ఫాల్గుణ మాసం – పునర్వసు నక్షత్రం
హస్త, మృగశీర్షా నక్షత్రములతో కూడిన ఆదివారములు స్వామి వారికి ప్రీతిదాయకములు. పూర్వాభద్ర నక్షత్రం స్వామివారి జన్మ నక్షత్రం. అదియును పర్వదినము. ప్రతి శనివారము స్వామివారికి పూజలు చేయుట విధి. అమావాస్యతో కూడిన సోమవారము, ప్రతి మంగ ళవారం స్వామి వారి పూజకు ప్రీతి దినములు. వైధృతియోగయు నందు (అనగా ఉత్తమము, అపూర్వము అగు గ్రహయోగకాలము, విష్కం భాది 27 యోగాలలో చివరిది వైధృతి యోగం) స్వామిని పూజించిన విశిష్ట ఫలసిద్ధి ప్రాప్తించును. ఆంజనేయస్వామి సప్తపదనుడనియు, ఏకాదశ శీర్షుడనియు తెలియుచున్నది.
శ్రీహనుమత్‌ స్వామికి అరటి తోటలంటే ఎక్కువ యిష్టం. కాబట్టి స్వామిని కదళీవనములలో పూజిస్తే శుభం చేకూరుతుంది. మంగళకరుడగు స్వామికి తమలపాకుల పూజ పరమ ప్రీతికరం. అలాగే పారిజాతాలు, మందారాలు, నందివర్ధనం, మల్లెలు, గన్నేరు మొదలైన పుష్పాలు స్వామికి ఆనందము కలిగిస్తాయి. తులసీ, మారేడు, మామిడి, మాచీపత్రము, ఉత్తరేణి పత్రములు ప్రీతికరములు. అరటి, మామిడి, నిమ్మ, కొబ్బరి, పనస, నేరేడు మొదలైన ఫలాలు స్వామి వారికి అత్యంత ప్రీతికరం.
సింధూరము, సింధూరాక్షతలు, పసుపు అక్షతలు, కుంకుమ, సాంబ్రాణి, గుగ్గిలము, కర్జూరము మొదలైన పూజాద్రవ్యాలు, పాయసం, పొంగలి, అప్పాలు, వడలు, వడపప్పు, పానకం, పాలు మొదలైన నివేదన ద్రవ్యాలు స్వామికి నివేదిస్తే, స్వామి సంతుష్టుడు అవుతారు. ఆవు నేతితో చేసిన దీపారాధన శ్రేష్ఠం.
– శ్రీ
