మనం గుడికి వెళ్లినప్పుడు దైవ దర్శనం తర్వాత తప్పనిసరిగా చేసే పని ప్రదక్షిణ. చాలామంది ఇది కేవలం ఒక ఆచారం అనుకుంటారు కానీ దీని వెనుక అద్భుతమైన శాస్త్రీయ దృక్పథం దాగి ఉంది. భగవంతుడిని కేంద్ర బిందువుగా చేసుకుని చేసే ఈ ప్రదక్షిణ, మనసులోని అలజడిని తగ్గించి ప్రశాంతతను చేకూరుస్తుంది. అసలు ప్రదక్షిణ అంటే ఏమిటి? మనం కుడి వైపు నుంచే ఎందుకు తిరగాలి? ఈ సంప్రదాయం వెనుక ఉన్న రహస్యాలను తెలుసుకుందాం.
ప్రదక్షిణ అనే పదంలో ‘ప్ర’ అంటే పాప వినాశనం, ‘ద’ అంటే కోరికల తీర్చడం, ‘క్షి’ అంటే జన్మ రాహిత్యం, ‘ణ’ అంటే జ్ఞానోదయం అని అర్థం. ఆధ్యాత్మికంగా చూస్తే, భగవంతుడు మన జీవితానికి కేంద్ర బిందువు అని ఆయన చుట్టూనే మన ప్రపంచం తిరుగుతోందని చెప్పడమే దీని ఉద్దేశం. ఆలయంలోని గర్భాలయం శక్తికి నిలయం.
విగ్రహం నుండి వెలువడే ధనాత్మక శక్తి (Positive Energy) గడియారం ముల్లు తిరిగే దిశలో (Clockwise) ప్రవహిస్తుంది. అందుకే మనం కుడి వైపు నుండి ప్రదక్షిణ చేసినప్పుడు, ఆ దివ్య శక్తి మన శరీరంలోని అణువణువుకూ తాకి మనలోని ప్రతికూల ఆలోచనలను దూరం చేస్తుంది.
శాస్త్రీయంగా చూస్తే, ప్రదక్షిణలు చేయడం వల్ల శారీరక వ్యాయామంతో పాటు మానసిక ఏకాగ్రత పెరుగుతుంది. ప్రదక్షిణ చేసేటప్పుడు వేగంగా పరుగెత్తకుండా అడుగులో అడుగు వేస్తూ నిదానంగా నడవాలని శాస్త్రం చెబుతోంది. ఇలా చేయడం వల్ల మన శ్వాసక్రియ క్రమబద్ధం అవుతుంది. సాధారణంగా 3, 5, 11 లేదా 21 ప్రదక్షిణలు చేయడం వెనుక కూడా అంతరార్థం ఉంది. మూడు ప్రదక్షిణలు చేస్తే కాయక (శరీరం), వాచిక (మాట), మానసిక పాపాలు తొలగిపోతాయని నమ్మకం. మన దైనందిన ఒత్తిడి నుండి ఉపశమనం పొందేందుకు, మన ఆత్మవిశ్వాసాన్ని పెంచుకోవడానికి ఈ సంప్రదాయం ఒక గొప్ప ధ్యానంలా పనిచేస్తుంది.
గమనిక: ప్రదక్షిణ చేసేటప్పుడు ధ్వజస్తంభాన్ని తాకకూడదని, అలాగే గర్భాలయ గోడలకు తగలకుండా భక్తితో నడవాలని పెద్దలు మరియు ఆగమ శాస్త్రాలు సూచిస్తున్నాయి.
