ముక్కు మూసుకుపోయి, తల బరువెక్కినప్పుడు కలిగే అసౌకర్యం మాటల్లో చెప్పలేనిది. అది సాధారణంగా అలర్జీ లేదా సైనస్ సమస్య వల్ల కావచ్చు. శ్వాస తీసుకోడానికి కష్టం, నిద్ర పట్టదు, చిరాకు ఇలాంటి ఇబ్బందులు మీ రోజువారీ జీవితాన్ని ప్రభావితం చేస్తాయి. అయితే ఈ ఇబ్బంది నుండి బయటపడటానికి మనమేం చేయాలి? ఎలాంటి జాగ్రత్తలు తీసుకుంటే ఉపశమనం లభిస్తుందో ఇప్పుడు తెలుసుకుందాం.
ముక్కు మూసుకుపోయినప్పుడు మనం తీసుకునే చిన్నపాటి జాగ్రత్తలు కూడా గొప్ప ఉపశమనాన్ని ఇస్తాయి. ఇక్కడ సైనస్ మరియు అలర్జీ కారణంగా వచ్చే ముక్కు మూసుకుపోవడాన్ని తగ్గించడానికి కొన్ని పద్ధతులు తెలుసుకోవటం ముఖ్యం. స్వయంగా ఇంట్లోనే పాటించదగిన సులభ చిట్కాలేమిటో చూద్దాం..
మొదటగా ఆవిరి పట్టడం అనేది అత్యంత ప్రభావవంతమైన చిట్కా. వేడి నీళ్లలో కొద్దిగా యూకలిప్టస్ ఆయిల్ వేసి, ముఖాన్ని కప్పుకుని ఆవిరి పట్టుకోవడం వల్ల ముక్కులోని శ్లేష్మం పలుచబడి, మూసుకున్న మార్గాలు తెరుచుకుంటాయి. రోజుకు కనీసం రెండు సార్లు ఇలా చేయడం మంచిది.
రెండవది శరీరాన్ని ఎప్పుడూ హైడ్రేటెడ్‌గా ఉంచుకోవాలి. వేడి నీళ్లు, హెర్బల్ టీ లేదా చికెన్ సూప్ వంటివి ఎక్కువగా తీసుకోవడం వల్ల కూడా ముక్కులో పేరుకుపోయిన ద్రవం పలుచబడి సులభంగా బయటకు పోతుంది. నీటి లవణ ద్రావణం లేదా నేటి పాట్, ఉపయోగించి ముక్కును శుభ్రం చేసుకోవడం కూడా సైనస్ సమస్యకు ఒక అద్భుతమైన పరిష్కారం.
అలర్జీ కారణంగా ముక్కు మూసుకుపోతే, మీరు ఏ ట్రిగ్గర్‌లకు (దుమ్ము, పుప్పొడి, పెంపుడు జంతువుల బొచ్చు) అలర్జీ అవుతున్నారో గుర్తించి, వాటికి దూరంగా ఉండాలి. రాత్రి పడుకునేటప్పుడు తల కింద ఒకటి లేదా రెండు దిండ్లు అదనంగా పెట్టుకోవడం వల్ల తల కొద్దిగా ఎత్తులో ఉండి, సైనస్ ప్రెజర్ తగ్గి, శ్వాస సులభమవుతుంది. ముఖ్యంగా, మీరు పడుకునే గదిలో హ్యుమిడిఫైయర్ ఉపయోగించడం వలన గదిలోని గాలిలో తేమ పెరిగి, ముక్కు పొడిబారకుండా, శ్వాస మార్గాలు సుఖంగా ఉంటాయి.
అలర్జీ లేదా సైనస్ వల్ల ముక్కు మూసుకుపోవడం అనేది తాత్కాలికమే. ఈ సాధారణ ఇంటి చిట్కాలను క్రమం తప్పకుండా పాటిస్తే, మీరు త్వరగా ఉపశమనం పొందవచ్చు. సరైన జాగ్రత్తలు తీసుకోవడం ద్వారా, మీరు ముక్కు మూతబడిన అసౌకర్యాన్ని అధిగమించి, హాయిగా శ్వాస తీసుకోవచ్చు.
గమనిక: ముక్కు మూసుకుపోవడం లేదా నొప్పి దీర్ఘకాలంగా కొనసాగినా, తీవ్ర జ్వరంతో కూడిన లక్షణాలు ఉన్నా, వెంటనే వైద్యుడిని సంప్రదించడం చాలా ముఖ్యం.
