మనం రోజువారీ తినాల్సిన గరిష్ట కొలెస్టరాల్‌ పరిమితి 300 మిల్లీగ్రాములు మాత్రమే. జాతీయ పోషకాహార సంస్థ, భారత వైద్య పరిశోధన మండలి మార్గదర్శకాల ప్రకారం పరిమితి ఇదే.
గుడ్డు – ప్రాంతాలు, ప్రదేశాలు, వయసులతో సంబంధం లేకుండా మనం ఎంతో ఇష్టంగా తినే ఒకే ఒక ఆహారం. మనం తినే ఆహారపదార్థాలలో అత్యంత బలవర్ధకమైనది, రుచికరమైనది కూడా గుడ్డే. అందుకే ప్రపంచవ్యాప్తంగా గుడ్ల వాడకం గరిష్టస్థాయిలో ఉంది. ఎన్నో రకాల ఇతర ఆహారపదార్థాలను తయారుచేయడానికి కూడా గుడ్డును వాడతారని మనకు తెలుసు. స్వీట్లు, హాట్లు, స్నాక్స్‌… ఇలా ఎందులోపడితే అందులో విచ్చలవిడిగా వాడుతున్నారు. రుచికి రుచి, బలానికి బలం.. ఇంకేంకావాలి?
ఒక గుడ్డులో 180 నుంచి 300 మిల్లీగ్రాముల కొలెస్టరాల్‌ ఉంటుంది. అదికూడా పచ్చసొనలోనే. తెల్లసొనలో అసలు కొలెస్టరాలే ఉండదు. జాతీయ పోషకాహార సంస్థ, భారత వైద్య పరిశోధన మండలి మార్గదర్శకాల ప్రకారం రోజుకు 300 మి.గ్రాల కొలెస్టరాల్‌ మాత్రమే తీసుకోవాల్సివుంటుంది. అంతమాత్రాన గుడ్లపై పడిపొమ్మని కాదు. ఎందుకంటే గుడ్లలో సంతృప్ల కొవ్వులు కూడా ఉంటాయి. అవి గుండె సంబంధిత రుగ్మతలను పెంచే అవకాశముంది.
వారానికి ఎన్ని తినాలి?
సంతులిత ఆహారంలో భాగంగా, రోజుకు ఒకటి చొప్పున వారానికి 3 లేదా 4 రోజలు తింటే పెద్దవాళ్లకు చాలా మంచిది. మళ్లీ ఇది ఇతరత్రా స్వీట్లు, వంటకాలతో కాదు. కేవలం ఉడకపెట్టినవి లేదా ఆమ్లెట్‌ రూపంలోనే. గుండెజబ్బులు ఉన్నవారు, చెడు కొలెస్టరాల్‌ ఎక్కువగా ఉన్నవారు వారానికి మూడింటికే పరిమితమైతే మంచిది. చిన్నపిల్లలు మాత్రం రోజుకొకటి తినేయొచ్చు.
