ఒకప్పుడు 40 అంటే జీవితంలో స్థిరపడి, కుటుంబంతో సంతోషంగా గడిపే సమయం. కానీ నేటి యువత, ముఖ్యంగా 40 ఏళ్ల వయస్సులో ఉన్నవారు కూడా బంధాలు, వివాహాలు, స్థిరమైన సంబంధాలపై విముఖత చూపుతున్నారు. ఆర్థిక స్థిరత్వం ఉన్నా, ఎందుకీ ఒంటరితనం? ‘కమిట్మెంట్ ఫోబియా’ అనేది కేవలం చిన్నవారికే కాదు అనుభవం ఉన్నవారిని కూడా వెంటాడుతోంది. ఈ ఆందోళన వెనుక దాగి ఉన్న పెద్ద కారణాలు ఏమై ఉంటాయో నిపుణుల అభిప్రాయం ప్రకారం తెలుసుకుందాం.
సామాజిక-ఆర్థిక మార్పులు: 40 ఏళ్ల వయస్సులో సంబంధాలపై విముఖత చూపడానికి ప్రధాన కారణాలలో సామాజిక మరియు ఆర్థిక మార్పులు ముఖ్యమైనవి. నేటి తరం ఆర్థిక స్వాతంత్ర్యాన్ని, వ్యక్తిగత స్వేచ్ఛను ఎక్కువగా కోరుకుంటోంది. ఒక స్థిరమైన బంధంలోకి వెళ్తే తమ స్వేచ్ఛకు, కలలకు ఆటంకం కలుగుతుందనే భయం అధికంగా ఉంటుంది. అలాగే 40 ఏళ్ల వారు ఇప్పటికే విడాకులు, విఫలమైన దీర్ఘకాలిక సంబంధాలు లేదా ప్రియమైన వారిని కోల్పోయిన బాధ వంటి తీవ్రమైన గత అనుభవాలను చూసి ఉండవచ్చు.
ఇటువంటి అనుభవాలు వారికి మళ్లీ ఒక బంధాన్ని నమ్మడానికి, కొత్తగా కమిట్ కావడానికి భయాన్ని కలిగిస్తాయి. ‘ఒంటరితనం మంచిది బంధంలో బాధలు అవసరం లేదు’ అనే దృక్పథం పెరుగుతోంది. వృత్తి జీవితంలో ఎక్కువ విజయం సాధించడం, దానిపైనే ఎక్కువ దృష్టి పెట్టడం కూడా వ్యక్తిగత జీవితాన్ని పక్కన పెట్టేందుకు దారితీస్తుంది.
ఆందోళన, ఒత్తిడి: 40 ఏళ్లలో సంబంధ వైముఖ్యం పెరగడానికి మానసిక ఒత్తిడి మరియు ఆందోళన మరొక ప్రధాన కారణం. ఈ వయస్సులో పిల్లల భవిష్యత్తు, తల్లిదండ్రుల ఆరోగ్యం, వృత్తిలో పోటీ వంటి అనేక అంశాల వల్ల అధిక ఒత్తిడి ఉంటుంది. ఈ ఒత్తిడిని భరించడానికి, చాలా మంది తమ శక్తిని, సమయాన్ని మరొకరితో బంధాన్ని పెంచుకోవడానికి కేటాయించలేరు. అంతేకాకుండా, సోషల్ మీడియా ప్రభావంతో ‘పర్ఫెక్ట్ రిలేషన్షిప్’ అనే అవాస్తవ అంచనాలు పెరిగాయి.
ఏ చిన్న లోపం వచ్చిన ఉన్నా సంబంధాన్ని వదులుకోవడానికి, లేదా అసలు బంధంలోకి వెళ్లకపోవడానికే మొగ్గు చూపుతున్నారు. ఈ క్రమంలో, తమకు సరిపోయే ‘ఆదర్శవంతమైన వ్యక్తి’ దొరకలేదనే అన్వేషణలో, ఒంటరితనాన్ని కొనసాగిస్తున్నారు. ఇది క్రమంగా, సంబంధాలు, నిబద్ధత పట్ల తీవ్రమైన విముఖతకు దారి తీస్తుంది.
40 ఏళ్ల వయస్సులో సంబంధాల పట్ల విముఖత అనేది కేవలం ఒక వ్యక్తి సమస్య కాదు, ఇది వేగంగా మారుతున్న సామాజిక ధోరణి. ఆర్థిక స్వతంత్రం గత గాయాలు, పెరిగిన ఒత్తిడి మరియు అవాస్తవ అంచనాలు ఈ వైముఖ్యాన్ని పెంచుతున్నాయి.
అయితే మానవ జీవితంలో ప్రేమ, తోడు అత్యంత ముఖ్యమైనవి. సరైన మానసిక మద్దతు, గత అనుభవాల నుంచి నేర్చుకోవడం, మరియు సహేతుకమైన అంచనాలతో ముందుకు సాగితే, ఈ వయస్సులో కూడా బలమైన, సంతోషకరమైన బంధాన్ని ఏర్పరచుకోవడం సాధ్యమే అంటున్నారు నిపుణులు.
