సంక్షేమ గృహాలు, గురుకుల పాఠశాలల్లో భోజనం విద్యార్థుల ప్రాణాల మీదకు తెస్తోంది. కలుషిత ఆహారం వల్ల దాదాపు రోజు పదుల సంఖ్యలో విద్యార్థులు అస్వస్థతకు గురవుతున్నారు. అయినా ప్రభుత్వం దీనిపై చర్యలు తీసుకోవడం లేదు. ఓ వైపు తమ పిల్లల ఆరోగ్యం ఏమవుతుందోనని తల్లిదండ్రులు ఆందోళన చెందుతున్నారు. తాజాగా కలుషిత ఆహారం తిని 20 మంది విద్యార్థులు తీవ్ర అస్వస్థతకు గురయ్యారు. ఈ ఘటన కుమురంభీం ఆసిఫాబాద్‌ జిల్లా కాగజ్నగర్‌లోని మైనారిటీ గురుకుల పాఠశాలలో చోటుచేసుకుంది.
పురుగులు పట్టిన అన్నం తినడం వల్లే అస్వస్థతకు గురయ్యారని విద్యార్థులు ఆందోళన చేశారు. భోజనంలో పురుగులు వచ్చాయని ప్రిన్సిపాల్, వార్డెన్‌కు చెప్పినా పట్టించుకోవడంలేదని ఆవేదన వ్యక్తం చేశారు. ఈ విషయం తెలుసుకున్న మీడియా ప్రతినిధులు పాఠశాల వద్దకు చేరుకోవడంతో పాఠశాల సిబ్బంది లోపలికి అనుమతించలేదు. అప్పటికే విద్యార్థులు తీవ్ర అస్వస్థతకు గురవడంతో వెనుకవైపు నుంచి పంపించేందుకు ప్రయత్నించారు. పోలీసులు రావడంతో.. వారి వాహనంలోనే విద్యార్థులను స్థానిక ప్రైవేటు ఆసుపత్రికి తరలించారు
