ఆంధ్రప్రదేశ్ లో ఫుడ్ ప్రాసెసింగ్ యూనిట్లను ప్రారంభించారు సీఎం వైఎస్ జగన్మోహన్ రెడ్డి. తాడేపల్లి క్యాంపు కార్యాలయం నుండి వర్చువల్ గా ఈ కార్యక్రమంలో పాల్గొన్నారు. రూ 1,719 కోట్లతో రాష్ట్రంలో 11 ఆహార శుద్ధి యూనిట్లను ప్రభుత్వం ఏర్పాటు చేస్తోంది. ఇందులో ఆరు యూనిట్లు పూర్తి కావడంతో వాటిని ప్రారంభించారు సీఎం జగన్. మిగతా వాటికి శంకుస్థాపన చేశారు.
ఈ సందర్భంగా పలు ఆహార ఉత్పత్తులను ఆయన పరిశీలించారు. ఏటా 3.14 లక్షల టన్నుల సామర్థ్యంతో ఏర్పాటు చేస్తున్న ఈ యూనిట్ల ద్వారా 925 మందికి ప్రత్యక్షంగా ఉపాధి కలుగుతుండగా.. 40,307 మంది రైతులకు మేలు జరగనుంది. ఈ ఫుడ్ ప్రాసెసింగ్ యూనిట్ల కోసం అవసరమైన ముడి సరుకును రైతుల నుంచి సేకరించిన సందర్భంగా వారికి ప్రభుత్వం నిర్దేశించిన కనీస మద్దతు ధరకు మించి కొనుగోలు చేయాలని ప్రభుత్వం నిబంధన విధించింది.
