శంషాబాద్ ప‌రిధిలో చోటు చేసుకున్న వెట‌ర్న‌రీ డాక్ట‌ర్ ప్రియాంక రెడ్డి హ‌త్యోదంతం మ‌రువ‌క ముందే అదే ప్రాంతంలో అలాంటిదే మ‌రొక దారుణం చోటు చేసుకుంది. శంషాబాద్ పోలీస్ స్టేష‌న్ ప‌రిధిలోని సిద్ధుల గుట్ట స‌మీపంలో కొందరు గుర్తు తెలియని దుండ‌గులు ఓ మ‌హిళ‌ను హ‌త్య చేసి కాల్చి వేసిన‌ట్లు పోలీసులు గుర్తించారు. ప్రియాంక రెడ్డి హ‌త్య‌కు సంబంధించి సైబరాబాద్ సీపీ స‌జ్జ‌నార్ మీడియాకు వివ‌రాల‌ను వెల్ల‌డిస్తున్న స‌మ‌యంలోనే ఈ ఘ‌ట‌న చోటు చేసుకోవ‌డం మ‌రింత క‌ల‌క‌లం సృష్టిస్తోంది.
కామాంధుల కాటుకు బ‌లైన ప్రియాంక రెడ్డి త‌ర‌హాలోనే మ‌రొక ఘ‌ట‌న అదే శంషాబాద్‌లో చోటు చేసుకోవ‌డం అల‌జ‌డి సృష్టిస్తోంది. ప్రియాంక రెడ్డిని దుండ‌గులు హ‌త్య చేసిన‌ట్లుగానే సిద్ధుల గుట్ట‌లోనూ కొందరు దుండ‌గులు ఓ మ‌హిళ‌ను దారుణంగా హ‌త్య చేసి పెట్రోల్ పోసి మృత‌దేహాన్ని త‌గుల‌బెట్టారు. స‌ద‌రు మ‌హిళ వ‌య‌స్సు 35 సంవ‌త్స‌రాల వ‌ర‌కు ఉంటుంద‌ని పోలీసులు భావిస్తున్నారు. ఈ క్రమంలో పోలీసులు సంఘ‌ట‌నా స్థ‌లానికి చేరుకుని ఘ‌ట‌న జ‌రిగిన తీరును ప‌రిశీలించ‌డంతోపాటు ఆ మ‌హిళ గురించిన వివ‌రాల‌ను ఆరా తీస్తున్నారు. కాగా ప్రియాంక రెడ్డి త‌ర‌హాలోనే ఈ ఘ‌ట‌న కూడా చోటు చేసుకోవ‌డం పోలీసుల‌కు మ‌రింత స‌వాల్‌గా మారింది.
