2025-26 ఆర్థిక సంవత్సరానికి ప్రవేశపెట్టిన కేంద్ర బడ్జెట్ పై తీవ్ర విమర్శలు చేశారు ఏపీ పీసీసీ చీఫ్ వైఎస్ షర్మిల. ఇది భారత బడ్జెట్ కాదు.. బీహార్ ఎన్నికల బడ్జెట్ అంటూ విమర్శించారు. ఈ బడ్జెట్ లో బీహార్ ని అందలానికి ఎక్కించి.. ఆంధ్రకు గుండు సున్నా ఇచ్చారని మండిపడ్డారు. కేంద్ర బడ్జెట్ లో రాష్ట్రానికి తీవ్ర అన్యాయం చేశారని అన్నారు షర్మిల. ఏపీ ప్రజల మద్దతుతో గెలుపొంది రాష్ట్రానికి తీరని ద్రోహం చేశారని బడ్జెట్ పై విమర్శలు గుప్పించారు. అవసరం ఉన్నంత సేపు ఓడ మల్లన్న.. గట్టెక్కాక బోడి మల్లన్న అనే విధంగా రాష్ట్ర ప్రజలను మోడీ.. బోడీ మల్లన్న కింద లెక్కగట్టారని తీవ్రంగా విమర్శించారు.
“బీహార్‌కి ‘ఫుల్’, ఏపీకి ‘నిల్’. ఇది భారత్ బడ్జెట్ కాదు. బీహార్ ఎన్నికల బడ్జెట్. మోడీ గారి భారత్ బడ్జెట్(బీహార్ ఎన్నికల)లో ఏపీకి కేటాయింపులు “కొండంత రాగం తీసి కూసంత పాట” పాడినట్లుంది. NDA భాగస్వామ్య పక్షంలో 12 మంది ఎంపీలు ఉన్న నితీష్ గారు బడ్జెట్‌లో అగ్రతాంబూలం అందుకుంటే.. 21 మంది ఎంపీలతో పెద్దన్న పాత్ర పోషించే చంద్రబాబు గారికి మోడీ గారు చిప్ప చేతిలో పెట్టారు. బీహార్‌ను అందలం ఎక్కించి, ఆంధ్రకు గుండు సున్నా ఇచ్చారు.
కేంద్ర బడ్జెట్‌లో రాష్ట్రానికి తీవ్ర అన్యాయం చేశారు. ఏపీ ప్రజల మద్దతుతో గద్దెనెక్కి రాష్ట్రానికి తీరని ద్రోహం చేశారు. బడ్జెట్‌లో ఈ సారి కూడా హోదా ప్రస్తావన లేకుండా రాష్ట్ర ప్రజల మనోభావాలను దెబ్బ తీశారు. రాజధాని అమరావతికి గతంలో ఇచ్చిన రుణం తప్పా.. ఇప్పుడు రూపాయి సహాయం లేదు. పోలవరం అంచనాలకు ఆమోదం అన్నారే కానీ బడ్జెట్‌లో ఆశించిన ఫలితం లేదు. విభజన హామీలను తుంగలో తొక్కారు. వెనుకబడిన ప్రాంతాలకు ప్రత్యేక నిధులు ఇవ్వలేదు.
రాష్ట్రానికి ప్రత్యేక పరిశ్రమలు కేటాయించలేదు. మెట్రో రైల్ ప్రాజెక్టును పట్టించుకోలేదు. కడప స్టీల్ ఊసే లేదు. రాష్ట్రాలకు సర్వసాధారణంగా ఇచ్చే అరకొర కేటాయింపులు, విదిలింపులే తప్ప ఏపీకి ఉపయోగపడే ప్రాజెక్టును ఒక్కటైనా ప్రకటించలేదు. అవసరం ఉన్నంత సేపు ఓడమల్లన్న… గట్టెక్కాక బోడి మల్లన్న..రాష్ట్ర ప్రజలను మోడీ గారు బోడి మల్లన్న కింద లెక్క గట్టారు. చంద్రబాబు గారి నిస్సహాయత, ఏపీపై కేంద్రానికి ఉన్న ఉదాసీనత ఈ బడ్జెట్‌తో తేటతెల్లం అయ్యింది. ఇంత అన్యాయం జరిగితే చంద్రబాబు గారు బడ్జెట్‌ను ప్రగతిశీల బడ్జెట్ అని స్వాగతించడం హాస్యాస్పదం”.అంటూ సోషల్ మీడియా వేదికగా పేర్కొన్నారు.
