అందంగా కనిపించడానికి, ముఖంపై జిడ్డు తగ్గడానికి బేబీ పౌడర్ లేదా ఫేస్ పౌడర్ వాడడం మనలో చాలామందికి అలవాటు. అయితే గత కొంతకాలంగా ఫేస్ పౌడర్ల వల్ల క్యాన్సర్ వచ్చే ప్రమాదం ఉందనే వార్తలు సోషల్ మీడియాలో తెగ హల్చల్ చేస్తున్నాయి. మరి ఇందులో ఎంతవరకు నిజం ఉందో, నిపుణులు ఏం సూచిస్తున్నారో ఇప్పుడు వివరంగా చూద్దాం.
టాల్క్ (Talc) అనే రసాయనం: మనం వాడే చాలా రకాల పౌడర్లలో ‘టాల్క్’ అనే ఖనిజాన్ని ఉపయోగిస్తారు. ఇది చర్మాన్ని పొడిగా ఉంచడానికి, మృదువుగా చేయడానికి హెల్ప్ చేస్తుంది. అయితే, భూమిలో ఈ టాల్క్ దొరికే చోటే ‘ఆస్బెస్టాస్’ (Asbestos) అనే మరో ప్రమాదకరమైన మూలకం కూడా ఉంటుంది. ఇక పౌడర్ తయారు చేసేటప్పుడు టాల్క్తో పాటు ఆస్బెస్టాస్ కూడా కలిస్తే, అది క్యాన్సర్కు దారితీసే అవకాశం ఉందని పరిశోధనల్లో తేలింది.
ఊపిరితిత్తుల సమస్యలు: మనం ముఖానికి పౌడర్ రాసుకునేటప్పుడు తెలీకుండానే దాన్ని శ్వాస ద్వారా లోపలికి పీల్చుకుంటాం. ఇలా ఆస్బెస్టాస్ కలిసిన పౌడర్ కణాలు ఊపిరితిత్తుల్లోకి చేరితే, కాలక్రమేణా అవి లోపల పేరుకుపోయి శ్వాసకోస సమస్యలు లేదా ఊపిరితిత్తుల క్యాన్సర్కు కారణం కావచ్చు. ఇక ముఖ్యంగా చిన్న పిల్లలకు పౌడర్ పూసేటప్పుడు మరింత జాగ్రత్తగా ఉండాలని డాక్టర్లు హెచ్చరిస్తున్నారు.
ఓవేరియన్ క్యాన్సర్ ముప్పు: కొంతమంది మహిళలు పౌడర్ను కేవలం ముఖానికే కాకుండా ప్రైవేట్ భాగాల్లో (సంతానోత్పత్తి అవయవాల దగ్గర) కూడా వాడుతుంటారు. ఇక అలా వాడడం వల్ల ఆ పౌడర్ కణాలు లోపలికి వెళ్లి ‘ఓవేరియన్ క్యాన్సర్’ (అండాశయ క్యాన్సర్) వచ్చే ఛాన్స్ ఉందని కొన్ని అధ్యయనాలు చెబుతున్నాయి. అందుకే ఆ భాగాల్లో టాల్కమ్ పౌడర్లను అస్సలు వాడకూడదని నిపుణులు గట్టిగా చెబుతున్నారు.
నిపుణుల సూచనలు.. ఏం చేయాలి?: క్యాన్సర్ ముప్పు నుంచి తప్పించుకోవడానికి నిపుణులు కొన్ని సింపుల్ చిట్కాలు సూచిస్తున్నారు. ఇక మార్కెట్లో దొరికే కెమికల్ పౌడర్లకు బదులుగా.. మొక్కల నుంచి తయారుచేసే ‘కార్న్ స్టార్చ్’ (మొక్కజొన్న పిండి) బాణం పిండి లేదా ఓట్స్ ఆధారిత సేఫ్ పౌడర్లను ఎంచుకోవడం మంచిది. అలాగే కొనేటప్పుడు ప్యాకెట్పై ‘టాల్క్ ఫ్రీ’ అని ఉందో లేదో ఖచ్చితంగా చూసుకోవాలి.
గమనిక :ఫేస్ పౌడర్ వాడినంత మాత్రాన అందరికీ క్యాన్సర్ వచ్చేస్తుందని భయపడాల్సిన పనిలేదు. కానీ, అందులో ఉండే కెమికల్స్ వల్ల లాంగ్ రన్లో ముప్పు పొంచి ఉండే అవకాశం ఉంది. కాబట్టి బ్రాండెడ్ మరియు ఆర్గానిక్ పౌడర్లను వాడడం, వీలైనంత వరకు పౌడర్ వాడకాన్ని తగ్గించుకోవడమే మన ఆరోగ్యానికి శ్రీరామరక్ష.
