గాఢనిద్రలో ఉన్నప్పుడు అప్పుడప్పుడు గొంతు నొక్కేసినట్లు అనిపించిందా? ఊపిరి ఆడక, అరవాలన్నా మాట రాక ఒక్కసారిగా ఉలిక్కిపడి లేచారా? దెయ్యం వచ్చిందని భయపడే ఈ అనుభవం వెనుక ఒక పెద్ద సైంటిఫిక్ రీజన్ ఉంది. మనకు తెలియకుండానే నిద్రను చెడగొట్టే ఈ సైలెంట్ ప్రాబ్లం పేరే ‘అబ్స్ట్రక్టివ్ స్లీప్ ఆప్నియా’ (OSA). దీనివల్ల వచ్చే ప్రమాదాలు, కారణాలు ఏంటో ఇప్పుడు తెలుసుకుందాం..
అసలు ఏం జరుగుతుంది?: మనం నిద్రపోయేటప్పుడు మన శరీరంతో పాటు గొంతు భాగంలో ఉండే కండరాలు కూడా బాగా రిలాక్స్ అవుతాయి. అయితే కొందరిలో నాలుక లేదా టాన్సిల్స్ లాంటి మెత్తటి భాగాలు కిందికి జరిగి, మనం పీల్చే గాలి వెళ్లే దారిని పూర్తిగా అడ్డుకుంటాయి. దీనివల్ల కొద్ది సెకన్ల పాటు ఊపిరి ఆడనట్లు అనిపిస్తుంది.
మెదడుకు ఆక్సిజన్ కట్: ఈ బ్లాకేజీ కొన్ని సెకన్ల నుంచి నిమిషం పాటు ఉంటుంది. ఆ సమయంలో మెదడుకు ఆక్సిజన్ అందడం తగ్గుతుంది. గాలి ఆడడం లేదని మెదడు గుర్తించగానే, ప్రాణాలు కాపాడటం కోసం ఒక్కసారిగా మనల్ని నిద్రలోంచి మేల్కొలుపుతుంది. అయితేఇక ఈ గ్యాప్ చాలా తక్కువ సమయం ఉండడం వల్ల మనం ఎందుకు లేచామో కూడా గుర్తుపట్టలేము.
గురక వెనుక అసలు కథ: నిద్రలో వచ్చే గురక పక్కవారికి చిరాకు తెప్పించవచ్చు, కానీ అలా గురక పెట్టేవాళ్లే అసలు బాధితులు! గాలి వెళ్లే సన్నని మార్గంలో ఒత్తిడి పడటం వల్లే గురక వస్తుంది.ఇక రాత్రంతా పది నుంచి వందల సార్లు ఇలా ఊపిరి ఆగిపోతూ, మెలకువ వస్తూ ఉండటం వల్ల ఎంతసేపు పడుకున్నా పొద్దున్నే అలసటగా, నిద్ర సరిపోనట్లే ఉంటుంది.
బయటకు తెలియని జబ్బు: ఈ అబ్స్ట్రక్టివ్ స్లీప్ ఆప్నియా చాలా సైలెంట్గా నిద్రను పాడు చేస్తుంది. శరీరానికి తగినంత విశ్రాంతి దొరకకపోవడం వల్ల దీర్ఘకాలిక అలసట వస్తుంది. ఇక అంతేకాదు, భవిష్యత్తులో గుండె జబ్బులు, బీపీ వంటి ఎన్నో పెద్ద హెల్త్ ప్రాబ్లమ్స్ రావడానికి ఇది ఒక హెచ్చరిక లాంటిదని డాక్టర్లు చెబుతున్నారు.
నిద్రలో ఊపిరి ఆడనట్లు అనిపించడం దెయ్యాల వల్ల కాదు, అది మన శ్వాస వ్యవస్థలో వచ్చే చిన్న తేడా మాత్రమే. శరీరం ఇచ్చే ఇలాంటి సంకేతాలను అశ్రద్ధ చేయకుండా లైఫ్స్టైల్లో మార్పులు చేసుకుంటే హ్యాపీగా నిద్రపోవచ్చు, ఆరోగ్యాన్ని కాపాడుకోవచ్చు.
గమనిక: మీకు రోజూ విపరీతమైన గురక వస్తున్నా, పగటిపూట కూడా ఎక్కువ అలసటగా అనిపిస్తున్నా ఒక్కసారి స్లీప్ స్పెషలిస్ట్ లేదా పల్మనాలజిస్ట్ డాక్టర్ను కలిసి చెకప్ చేయించుకోవడం చాలా మంచిది.
