కొండచిలువలు తాము మింగిన ఆహారాన్ని అప్పుడప్పుడు వెనక్కి కక్కేయడం (Regurgitation) చూస్తుంటే చాలా ఆశ్చర్యంగా, భయంగా అనిపిస్తుంది. సోషల్ మీడియాలో ఇలాంటి వీడియోలు మనం తరచూ చూస్తూనే ఉంటాం. అసలు ఒక జంతువును అమాంతం మింగేసిన కొండచిలువ, మళ్ళీ దాన్ని ఎందుకు బయటకు వదిలేస్తుంది? దీని వెనుక ఉన్న శాస్త్రీయ కారణాలు ఏంటి? ఇది వాటికి ప్రాణసంకటమా? అనే ఆసక్తికరమైన విషయాలను మనం తెలుసుకుందాం..
ఆకలి వేస్తే కొండచిలువ ఏం చేస్తుంది?: కొండచిలువలు ఆహారాన్ని నమలవు, నేరుగా మింగేస్తాయి. వాటి దవడలు చాలా ఫ్లెక్సిబుల్గా ఉండటం వల్ల తమ కంటే రెండు మూడు రెట్లు పెద్దగా ఉన్న జంతువులను కూడా సులభంగా లోపలికి పంపించగలవు. అయితే, ఒక్కసారి ఆహారం మింగిన తర్వాత దాన్ని జీర్ణం చేసుకోవడానికి వీటికి చాలా రోజుల సమయం పడుతుంది. ఈ సమయంలో అవి చాలా బద్ధకంగా, ఒకే చోట పడి ఉంటాయి.
కక్కేయడానికి ప్రధాన కారణాలు ఇవే!: ఆత్మరక్షణ ఆహారం మింగిన తర్వాత కొండచిలువ శరీరం చాలా బరువుగా మారుతుంది. ఆ సమయంలో ఏదైనా శత్రువు దాడి చేస్తే, తప్పించుకోవడానికి వీలుగా ఉండదు. ఇక ప్రాణభయం కలిగినప్పుడు, శరీరాన్ని తేలిక చేసుకోవడానికి అవి వెంటనే ఆహారాన్ని బయటకు కక్కేసి వేగంగా తప్పించుకుంటాయి.
భారీ ఆహారం: ఒక్కోసారి తన శక్తికి మించిన పెద్ద జంతువును మింగినప్పుడు, అది లోపల ఇమడక లేదా గాలి ఆడక ఇబ్బంది పడతాయి. ఇక పోతే, జీర్ణక్రియ సరిగ్గా జరగకపోయినా లేదా ఆహారం లోపల కుళ్ళిపోతున్నా అవి కక్కేస్తాయి
ఈ కక్కేసే ప్రక్రియ కొండచిలువలకు చాలా కష్టతరమైనది. అసలు విషయం ఏమిటంటే ఆహారాన్ని వెనక్కి పంపేటప్పుడు ఆ జంతువు కొమ్ములు లేదా ఎముకలు కొండచిలువ గొంతును నోటిని గాయపరిచే అవకాశం ఉంది. అంతేకాదు, జీర్ణక్రియ కోసం విడుదలైన ఆమ్లాలు కూడా వాటి నోటిని దెబ్బతీస్తాయి. అందుకే అవి అత్యవసరమైతే తప్ప ఈ పని చేయవు.
కొండచిలువలు ఆహారాన్ని కక్కేయడం అనేది వాటి మనుగడ కోసం చేసే ఒక పోరాటం. ఇది చూడ్డానికి వింతగా ఉన్నా, ప్రకృతిలో అవి తమను తాము కాపాడుకోవడానికి ఎంచుకున్న మార్గం. భారీ ఆహారం కంటే ప్రాణం ముఖ్యమని భావించినప్పుడే అవి ఇలా చేస్తాయి.
గమనిక: కొండచిలువలు ఆహారం తీసుకున్నప్పుడు వాటిని డిస్టర్బ్ చేయడం ప్రమాదకరం. అవి ఒత్తిడికి లోనై ఆహారాన్ని కక్కేస్తే, నీరసించి చనిపోయే అవకాశం కూడా ఉంటుంది.