రాత్రి వేళల్లో పని ఒత్తిడిని తగ్గించుకోవడానికో లేదా నిద్రను తరిమికొట్టడానికో మీరు వేడి వేడి కాఫీ తాగుతున్నారా? అయితే ఒక్క నిమిషం ఆగండి. ఆ కాఫీ కప్పు కేవలం మీ నిద్రనే కాదు మీ ప్రవర్తనను కూడా మార్చేస్తోంది! రాత్రిపూట కాఫీ తాగడం వల్ల మెదడు తన నియంత్రణను కోల్పోయి ఆవేశపూరిత నిర్ణయాలు తీసుకునేలా చేస్తుందని తాజా పరిశోధనల్లో తేలింది. ముఖ్యంగా మహిళలపై ఈ ప్రభావం చాలా ఎక్కువగా ఉంటుందట. అదెలాగో ఇక్కడ తెలుసుకుందాం.
రాత్రిపూట కాఫీతో వచ్చే తిప్పలు: చాలా మందికి నైట్ డ్యూటీలు చేసేటప్పుడో లేదా చదువుకునేటప్పుడో కాఫీ తాగడం అలవాటు. కాఫీలోని కెఫీన్ మనల్ని హుషారుగా ఉంచుతుందని అనుకుంటాం. కానీ రాత్రిపూట కెఫీన్ తీసుకోవడం వల్ల ఆలోచించకుండా ఆవేశంగా నిర్ణయాలు తీసుకోవడం అనవసరమైన రిస్కులు తీసుకోవడం వంటి ప్రవర్తనా మార్పులు వస్తాయని ‘ఐసైన్స్’ జర్నల్లో ప్రచురితమైన ఓ పరిశోధన చెబుతోంది.
మహిళల్లో ఎందుకు ఎక్కువ ప్రభావం?: పురుషులతో పోలిస్తే మహిళల్లో ఈ ఆవేశపూరిత ప్రవర్తన చాలా ఎక్కువగా ఉన్నట్లు టెక్సాస్ విశ్వవిద్యాలయ పరిశోధకులు గుర్తించారు. ఇక దీనికి కారణం స్త్రీల శరీరంలోని హార్మోన్లు, జీవక్రియలు కెఫీన్కు భిన్నంగా స్పందించడమే, కెఫీన్ వల్ల మెదడులో విడుదలయ్యే డోపమైన్ వంటి రసాయనాలు మహిళల భావోద్వేగాలపై ఎక్కువ ప్రభావం చూపుతాయి.
మెదడులో ఏం జరుగుతుంది?: సాధారణంగా రాత్రి పూట మన మెదడులో ‘అడెనోసిన్’ అనే రసాయనం విడుదలై మనల్ని విశ్రాంతి వైపు నడిపిస్తుంది. కానీ కాఫీ తాగినప్పుడు ఆ కెఫీన్ ఈ రసాయనాన్ని అడ్డుకుని మెదడును అతిగా ఉత్తేజపరుస్తుంది. ఇక శరీరం నిద్రపోవాల్సిన టైంలో ఇలా జరగడం వల్ల మన విచక్షణ దెబ్బతింటుంది. ఫలితంగా డబ్బుల విషయంలో తప్పుడు నిర్ణయాలు తీసుకోవడం, డ్రైవింగ్లో అజాగ్రత్తగా ఉండటం వంటివి జరుగుతాయి.
పగలు తాగితే పర్లేదా?: ఆశ్చర్యకరమైన విషయం ఏంటంటే.. ఇదే కాఫీని పగటిపూట తాగినప్పుడు ప్రవర్తనలో ఎలాంటి తేడాలు కనిపించలేదు. అంటే కెఫీన్ తీసుకునే సమయం మన మెదడుపై తీవ్ర ప్రభావం చూపుతుంది. ఇక అందుకే నిద్రపోయే కనీసం ఆరు గంటల ముందు నుండే కాఫీ లేదా టీలకు దూరంగా ఉండాలని డాక్టర్లు చెబుతున్నారు.
కాఫీ అనేది ఒక అద్భుతమైన పానీయమే, కానీ దాన్ని సరైన సమయంలో తాగకపోతే అది ఒక విషవలయంగా మారుతుంది. రాత్రి తాగితే నిద్ర రాదు, పొద్దున అలసటగా ఉంటుంది, ఆ అలసట పోవడానికి మళ్ళీ కాఫీ తాగుతాం! అందుకే నైట్ టైమ్ కాఫీని పక్కన పెట్టి, ప్రశాంతమైన నిద్రకు ప్రాధాన్యత ఇవ్వండి.
గమనిక: ఈ సమాచారం అంతా తాజా పరిశోధనల ఆధారంగా కేవలం మీ అవగాహన కోసం మాత్రమే ఇవ్వబడింది. కాఫీ అలవాటు వల్ల తీవ్రమైన నిద్రలేమి లేదా మానసిక ఒత్తిడి ఎదురైతే వైద్యులను సంప్రదించడం మంచిది.
