లుకేమియా (బ్లడ్ క్యాన్సర్) అనేది ప్రధానంగా రక్తం, ఎముక మజ్జపై ప్రభావం చూపే తీవ్రమైన సమస్య. సాధారణ రక్త పరీక్షల (CBC) ద్వారా దీనిని ముందే పసిగట్టవచ్చు. అయితే చాలామందికి తెలియని విషయమేంటంటే.. ఇది అరుదుగా నరాలను, నాడీ వ్యవస్థను కూడా ప్రభావితం చేస్తుంది. అసలు ఇది నరాలపై ఎలా ప్రభావం చూపుతుంది, దీని ప్రధాన లక్షణాలు ఏంటో ఇప్పుడు వివరంగా తెలుసుకుందాం.
నరాల్లో లుకేమియా ప్రభావం ఎలా ఉంటుంది?: లుకేమియా నేరుగా నరాల్లో పుట్టదు. కానీ అరుదైన సందర్భాల్లో క్యాన్సర్ కణాలు నాడీ వ్యవస్థలోకి లేదా నరాల్లోకి ప్రవేశిస్తాయి. ఇక దీనిని వైద్యభాషలో ‘న్యూరోలుకేమియోసిస్’ అంటారు. అలాగే చికిత్సలో వాడే కీమోథెరపీ మందులు లేదా వెన్నుపాము నరాలపై పడే ఒత్తిడి వల్ల కూడా నరాల బలహీనత వస్తుంది.
ప్రధానంగా కనిపించే నరాల లక్షణాలు: నరాలు ప్రభావితమైనప్పుడు చేతులు, కాళ్లలో తీవ్రమైన జలదరింపు, తిమ్మిర్లు మరియు మంటలు వస్తాయి. ఇక అవయవాలలో వివరించలేని నొప్పి లేదా హఠాత్తుగా బలహీనత రావడం, పట్టు కోల్పోవడం వంటి సమస్యలు కనిపిస్తాయి.
సాధారణ లుకేమియా సంకేతాలు: దీనితో పాటు ఎంత విశ్రాంతి తీసుకున్నా తగ్గని నిస్సత్తువ, తరచుగా వచ్చే జ్వరాలు, రాత్రిపూట అధికంగా చెమటలు పట్టడం జరుగుతుంది. ఇక చిన్న దెబ్బ తగిలినా రక్తం కారడం, ముక్కు లేదా చిగుళ్ల నుంచి రక్తస్రావం కావడం మరియు అకస్మాత్తుగా బరువు తగ్గడం వంటివి దీని ప్రధాన లక్షణాలు.
శరీరంలో వచ్చే ఇతర మార్పులు: రోగనిరోధక శక్తి తగ్గి తరచుగా ఇన్ఫెక్షన్ల బారిన పడటం, మెడ, చంకలు లేదా గజ్జల్లో నొప్పి లేని శోషరస కణుపులు (లింఫ్ నోడ్స్) వాపు రావడం జరుగుతుంది. అలాగే ఎముకలు లేదా కీళ్లలో నిరంతరం నొప్పి వేధిస్తుంటుంది.
ఈ లక్షణాలు సాధారణ అనారోగ్యాల వల్ల కూడా రావచ్చు, కానీ ఇవి నిరంతరంగా ఉంటే నిర్లక్ష్యం చేయకుండా వెంటనే డాక్టర్ను సంప్రదించి పరీక్షలు చేయించుకోవడం మంచిది. ముందస్తు గుర్తింపే ఏ క్యాన్సర్కైనా సరైన పరిష్కారం.
గమనిక: ఈ సమాచారం కేవలం అవగాహన కోసం మాత్రమే అందించబడింది. ఎలాంటి ఆరోగ్య సమస్యలు ఉన్నా నిపుణులైన వైద్యులను సంప్రదించి సరైన సలహాలు, వైద్య పరీక్షలు పొందడం శ్రేయస్కరం.
