తెలంగాణ బీజేపీలో అసంతృప్తి జ్వాలలు చెలరేగుతున్నాయి. ఇప్పటికే పలువురు సీనియర్లు తమ అసంతృప్తిని వెళ్లిబుచ్చగా.. అదే బాటలో మరి కొందరు ఉన్నట్లు తెలుస్తోంది. తాజాగా ఈటల రాజేందర్ ప్రధాన అనుచరుడు.. బీజేపీ సీనియర్ నేత ఏనుగు రవీందర్‌రెడ్డి అదే కోవలో ఉన్నట్లు చర్చ నడుస్తోంది.
ఇది ఇలా ఉంటె తెలంగాణ బీజేపీ ఎన్నికల కమిటీ చైర్మన్, హుజురాబాద్ ఎమ్మెల్యే ఈటల రాజేందర్ కీలక వ్యాఖ్యలు చేశారు. బుధవారం ఆయన మీడియాతో మాట్లాడుతూ.. బీజేపీ నేతలు ఎవరూ పార్టీని వీడటం లేదని క్లారిటీ ఇచ్చారు. పార్టీలో సీనియర్ల మధ్య ఎలాంటి విభేదాలు లేవని ఆయన స్పష్టం చేశారు. అధికార బీఆర్ఎస్, బీజేపీ మధ్య అవగాహన ఉందంటూ జరుగుతోన్న ప్రచారమంతా అవాస్తమని ఈటల కొట్టి పారేశారు. బీజేపీ, బీఆర్ఎస్ మధ్య ఎలాంటి అవగాహన లేదని తేల్చి చెప్పారు. సీఎం కేసీఆర్ అవినీతి పాలన పట్ల బీజేపీ వైఖరిలో మార్పు లేదని స్పష్టం చేశారు. కాంగ్రెస్ పార్టీ ఓ మునిగిపోయే నావ అని.. తెలంగాణలో జాకీలు పెట్టి లేపిన కాంగ్రెస్ పార్టీ లేవదని ఎద్దేవా చేశారు. వచ్చే ఎన్నికల్లో బీజేపీ ఘన విజయం సాధించి.. అధికారంలోకి రావడం ఖాయమని ఈటల దీమా వ్యక్తం చేశారు.
