మన జీవిత ప్రయాణంలో స్నేహం ఒక మధురమైన బంధం. మంచి స్నేహితులు మనల్ని పైకి లేవనెత్తితే చెడు స్నేహితులు మన జీవితాన్ని కుప్పకూల్చే ప్రమాదం ఉంది. ఎప్పుడూ మనల్ని కించపరుస్తూ రహస్యాలు బయటపెడుతూ మన విజయాన్ని చూసి ఈర్ష్యపడేవారు మన వెంటే ఉండవచ్చు. ఎంతో నమ్మకంతో మనం చెప్పే విషయాలను మనపైనే ఆయుధాలుగా ఉపయోగిస్తారు. మరి మన బంధాన్ని విషతుల్యం చేసే ఇలాంటి నకిలీ స్నేహితులను (Toxic Friends) ఎలా గుర్తించాలి? ఎప్పుడు ఆ బంధాన్ని తెంచుకోవాలి? తెలుసుకుందాం.
నకిలీ స్నేహితులను గుర్తించే లక్షణాలు: నిజమైన స్నేహితుడు మీ విజయాన్ని చూసి సంతోషిస్తాడు కానీ నకిలీ స్నేహితులు మీ సంతోషాన్ని పురోగతిని చూసి ఈర్ష్య పడతారు. మీరు ఏదైనా మంచి విషయం చెప్పినప్పుడు వారు మిమ్మల్ని అభినందించకుండా వెంటనే దాన్ని తక్కువ చేసి మాట్లాడతారు. లేదా వారి గురించి మాత్రమే చెప్పడం ప్రారంభిస్తారు. ఇది వారి మొదటి లక్షణం. రెండవది, వీరు మీ రహస్యాలను బలహీనతలను ఇతరుల ముందు లేదా మీకు వ్యతిరేకంగా ఉపయోగిస్తారు. మీరు నమ్మి చెప్పిన విషయాలను తేలికగా ఇతరులకు చెప్పేయడం లేదా మిమ్మల్ని ఇబ్బంది పెట్టడానికి వాటిని వాడుకోవడం చేస్తుంటారు.
మూడవ ముఖ్య లక్షణం: ఈ వ్యక్తులు ఎప్పుడూ మీ సమయాన్ని, శక్తిని దోచుకుంటారు కానీ మీకు ఏ మాత్రం తిరిగి ఇవ్వరు. వారు తమ సమస్యల గురించి గంటల తరబడి మాట్లాడతారు కానీ మీకు సమస్య వచ్చినప్పుడు మాయమైపోతారు లేదా మీ బాధను తీసిపారేస్తారు. వారి స్నేహం ఎప్పుడూ ‘తీసుకోవడం’ అనే సూత్రంపైనే ఆధారపడి ఉంటుంది ‘ఇవ్వడం’ అనేది వారికి తెలియదు. నాలుగవది మీలో ఆత్మవిశ్వాసాన్ని తగ్గిస్తారు. ఎప్పుడూ మీ తప్పులను మాత్రమే ఎత్తి చూపుతూ మీరు సరిపోరని మీకు అనిపించేలా చేస్తారు. మంచి స్నేహం మనల్ని ప్రేరేపిస్తుంది కానీ వీరు మనల్ని నిరుత్సాహపరుస్తారు.
చివరగా మీరు సరిహద్దులు పెట్టుకున్నా కూడా వాటిని లెక్కచేయరు. మీ వ్యక్తిగత విషయాల్లో అధికంగా జోక్యం చేసుకుంటారు మీ సమయాన్ని ప్రణాళికలను గౌరవించరు. మీరు వారితో మాట్లాడిన తర్వాత మీకు మానసిక ప్రశాంతత లభించకపోగా ఒత్తిడి ఆందోళన పెరిగితే ఆ స్నేహం విషపూరితమని (Toxic) మీరు అర్థం చేసుకోవాలి. మీ శ్రేయస్సు పట్ల వారికి నిజమైన శ్రద్ధ ఉండదు కేవలం వారి అవసరాల కోసమే మిమ్మల్ని వాడుకుంటారు.
నిజమైన స్నేహం అనేది పరస్పర గౌరవం మద్దతు మరియు నమ్మకం మీద ఆధారపడి ఉంటుంది. మీ జీవితంలో సంతోషాన్ని ప్రశాంతతను దూరం చేసే స్నేహాన్ని కొనసాగించడం అనవసరం. మిమ్మల్ని ప్రోత్సహించే, మీ ఎదుగుదలను చూసి హృదయపూర్వకంగా సంతోషించే వ్యక్తులతోనే మీ జీవితాన్ని పంచుకోండి. మీ మానసిక ఆరోగ్యం ఆత్మగౌరవం కంటే ఏ బంధమూ ముఖ్యం కాదు. విషపూరిత బంధాలను గుర్తించి వాటి నుండి దూరం కావడమే మీ జీవితానికి మీరు చేసే గొప్ప మేలు.
