మనిషి నూరేళ్లు బతకడమే గొప్ప అనుకుంటున్న ఈ రోజుల్లో, ఏకంగా 200 ఏళ్లు జీవించే అవకాశం ఉందంటే నమ్ముతారా? సముద్ర గర్భంలో రాజసంగా విహరించే ‘బోహెడ్’ (Bowhead) తిమింగలాల సుదీర్ఘ జీవితం వెనుక ఉన్న అసలు రహస్యాన్ని శాస్త్రవేత్తలు ఛేదించారు. వాటి శరీరంలోని ఒక ప్రత్యేకమైన ప్రోటీన్ వల్ల అవి క్యాన్సర్ దరిచేరనివ్వకుండా, డీఎన్ఏను రిపేర్ చేసుకుంటున్నాయని గుర్తించారు. ఈ ప్రయోగం మనుషుల మీద కూడా సక్సెస్ అయితే మన ఆయుష్షు రెట్టింపు అవ్వడం ఖాయం!
తిమింగలాల వెనుక ఉన్న ఆ మంత్రం!: సాధారణంగా జీవులు ముసలివవుతున్న కొద్దీ వాటి కణాల్లో డీఎన్ఏ దెబ్బతింటుంది. కానీ బోహెడ్ తిమింగలాల్లో మాత్రం CIRBP అనే ఒక అద్భుతమైన ప్రోటీన్ ఉంటుంది. రోచెస్టర్ యూనివర్సిటీ శాస్త్రవేత్తల పరిశోధన ప్రకారం, ఈ ప్రోటీన్ ఒక మెకానిక్ లాగా పనిచేస్తూ దెబ్బతిన్న డీఎన్ఏను ఎప్పటికప్పుడు రిపేర్ చేస్తుంది. అందుకే అవి రెండు శతాబ్దాల పాటు ఆరోగ్యంగా జీవించగలుగుతున్నాయి.
ఈగల్లో కనిపించిన అద్భుతం: ఈ రహస్యం తెలిశాక శాస్త్రవేత్తలు ఊరుకోలేదు. ఆ ప్రోటీన్ను కొన్ని రకాల ఈగల్లోనూ, మానవ కణాల్లోనూ ప్రవేశపెట్టి పరీక్షించారు. ఫలితం చూసి అందరూ ఆశ్చర్యపోయారు! ఇక ఆ ఈగలు సాధారణం కంటే ఎక్కువ కాలం బతిడమే కాకుండా, వాటిలో డీఎన్ఏ రిపేర్ ప్రక్రియ చాలా వేగంగా జరిగింది. అంటే ఈ టెక్నాలజీ కేవలం తిమింగలాలకే కాదు, ఇతర జీవులకు కూడా పనిచేస్తుందని అర్థమైంది.
క్యాన్సర్కు చెక్ పెట్టొచ్చా?: ఈ పరిశోధనలో మరో కీలక అంశం ఏంటంటే.. వ్యాధి నిరోధకత. బోహెడ్ తిమింగలాల్లో క్యాన్సర్ వచ్చే అవకాశాలు చాలా తక్కువ. ఒకవేళ ఈ ప్రోటీన్ టెక్నాలజీని మానవ చికిత్సల్లో వాడగలిగితే, ప్రాణాంతక వ్యాధులను ఎదుర్కోవడం చాలా సులభం అవుతుంది. ఇక మన శరీర కణాలను ఎప్పటికప్పుడు పునరుజ్జీవింపజేస్తూ యవ్వనంగా ఉంచడం దీనివల్ల సాధ్యం కావచ్చు.
మానవ జీవితం 2.0: ఒకవేళ ఈ ప్రయోగాలు మనుషులపై పూర్తిస్థాయిలో సక్సెస్ అయితే, 200 ఏళ్లు జీవించడం అనేది కల కాదు, ఒక వాస్తవం అవుతుంది. కేవలం బతకడమే కాదు, ముసలితనం వల్ల వచ్చే అనారోగ్యాలు లేకుండా ఆరోగ్యంగా ఉండటం ఈ పరిశోధన ప్రధాన లక్ష్యం. ఇక సైన్స్ ఇలాగే ముందుకు సాగితే భవిష్యత్తులో మన మనవలు, ముని మనవలతో కలిసి క్రికెట్ ఆడినా ఆశ్చర్యపోనక్కర్లేదు!
గమనిక: ఈ పరిశోధన ప్రస్తుతం ప్రయోగశాల దశలో ఉంది. ఇది పూర్తిస్థాయిలో మానవులకు అందుబాటులోకి రావడానికి మరిన్ని పరిశోధనలు, క్లినికల్ ట్రయల్స్ అవసరమవుతాయి.
