రాజ‌స్థాన్‌పై హైద‌రాబాద్ ఘ‌న విజ‌యం

దుబాయ్‌లో గురువారం జ‌రిగిన ఇండియ‌న్ ప్రీమియ‌ర్ లీగ్ 2020 టోర్నీ 40వ మ్యాచ్‌లో రాజ‌స్థాన్ రాయ‌ల్స్ పై స‌న్ రైజర్స్ హైద‌రాబాద్ ఘ‌న విజ‌యం సాధించింది. రాయ‌ల్స్ నిర్దేశించిన ల‌క్ష్యాన్ని హైద‌రాబాద్ అల‌వోక‌గా ఛేదించింది. బౌల‌ర్లు, బ్యాట్స్‌మెన్ ఈ మ్యాచ్‌ను గెలిపించారు. ఈ క్ర‌మంలో రాయ‌ల్స్‌పై హైద‌రాబాద్ 8 వికెట్ల తేడాతో గెలుపొందింది.

మ్యాచ్‌లో హైద‌రాబాద్ టాస్ గెలిచి ముందుగా ఫీల్డింగ్ ఎంచుకోగా రాయ‌ల్స్ బ్యాటింగ్ చేప‌ట్టింది. ఈ క్ర‌మంలో ఆ జ‌ట్టు నిర్ణీత 20 ఓవ‌ర్ల‌లో 6 వికెట్ల న‌ష్టానికి 154 ప‌రుగులు చేసింది. రాజ‌స్థాన్ బ్యాట్స్‌మెన్ల‌లో సంజు శాంస‌న్‌, స్టోక్స్‌లు మాత్ర‌మే ఫ‌ర్వాలేద‌నిపించారు. మిగిలిన ఎవ‌రూ ఆక‌ట్టుకోలేదు. శాంస‌న్ 26 బంతులు ఆడి 3 ఫోర్లు, 1 సిక్స‌ర్‌తో 36 ప‌రుగులు చేయ‌గా, స్టోక్స్ 32 బంతులు ఆడి 2 ఫోర్ల‌తో 30 ప‌రుగులు చేశాడు. హైద‌రాబాద్ బౌల‌ర్ల‌లో జేస‌న్ హోల్డ‌ర్ 3 వికెట్లు తీశాడు. శంక‌ర్‌, ర‌షీద్ ఖాన్‌ల‌కు చెరొక వికెట్ ద‌క్కింది.

అనంత‌రం బ్యాటింగ్ చేప‌ట్టిన హైద‌రాబాద్ 18.1 ఓవ‌ర్ల‌లోనే ల‌క్ష్యాన్ని ఛేదించింది. 2 వికెట్ల న‌ష్టానికి 156 ప‌రుగులు చేసింది. హైద‌రాబాద్ బ్యాట్స్‌మెన్ల‌లో మ‌నీష్ పాండే, విజ‌య్ శంక‌ర్‌లు అర్ధ సెంచ‌రీలు సాధించి అజేయంగా నిలిచారు. 47 బంతుల్లో 4 ఫోర్లు, 8 సిక్స‌ర్ల‌తో పాండే 83 ప‌రుగులు చేసి నాటౌట్ గా నిల‌వ‌గా, శంక‌ర్ 51 బంతులు ఆడి 6 ఫోర్ల‌తో 52 ప‌రుగులు చేసి నాటౌట్‌గా నిలిచాడు. రాజ‌స్థాన్ బౌల‌ర్ల‌లో జోఫ్రా ఆర్చ‌ర్‌కు 2 వికెట్లు దక్కాయి.