మన దేశంలో చాయ్ అనేది కేవలం ఒక పానీయం మాత్రమే కాదు.. అదొక ఎమోషన్. పొద్దున్నే లేచింది మొదలు, ఆఫీస్ బ్రేకులు, ఫ్రెండ్స్తో కబుర్లు, రైల్వే ప్లాట్ఫారమ్ల మీద సందడి.. ఇలా ప్రతిదానికీ చాయ్ ఉండాల్సిందే. రోడ్డు పక్కన ఉండే టప్రీల నుంచి పెద్ద పెద్ద కేఫీల వరకు చాయ్ ఇచ్చే కిక్కే వేరు. అలాంటి మన దేశీ చాయ్కి ఇప్పుడు ప్రపంచస్థాయిలో అరుదైన గౌరవం దక్కింది.
ప్రపంచంలోనే టాప్లో మన ‘మసాలా చాయ్’: ప్రముఖ ఫుడ్ గైడ్ ‘టేస్ట్ అట్లాస్’ తాజాగా విడుదల చేసిన ప్రపంచంలోని టాప్ 100 టీల జాబితాలో మన ‘మసాలా చాయ్’ మొదటి స్థానాన్ని కైవసం చేసుకుంది.ఇక ఘాటైన మసాలాలు, అల్లం ముక్కలు వేసి మరిగించిన మన మసాలా చాయ్ రుచికి ప్రపంచం ఫిదా అయిపోయింది. విదేశీయులు కూడా మన చాయ్ రుచిని మెచ్చుకోకుండా ఉండలేకపోతున్నారు.
లిస్టులో మెరిసిన మరికొన్ని ఇండియన్ చాయ్లు: కేవలం మసాలా చాయ్ మాత్రమే కాదు.. మన దేశంలోని విభిన్న ప్రాంతాల టీలు కూడా ఈ లిస్టులో సత్తా చాటాయి. సువాసనలకు కేరాఫ్ అడ్రస్ అయిన ‘డార్జిలింగ్ టీ’ 6వ స్థానంలో, స్ట్రాంగ్ టేస్ట్కి ఫేమస్ అయిన ‘అస్సాం చాయ్’ 13వ స్థానంలో నిలిచాయి. ఇక మన దేశంలో టీ సంస్కృతి ఎంత వైవిధ్యంగా ఉంటుందో ఈ ర్యాంకులు నిరూపించాయి.
కేరళ సులైమాని నుంచి కాశ్మీర్ నూన్ చాయ్ వరకు: కేరళకు చెందిన ప్రత్యేకమైన ‘సులైమాని చాయ్’ 39వ స్థానాన్ని దక్కించుకోగా, హిమాచల్ ప్రదేశ్కు చెందిన ‘కాంగ్రా టీ’ 41వ స్థానాన్ని సాధించింది. ఇక కాశ్మీర్లో తాగే పింక్ కలర్, కాస్త ఉప్పగా ఉండే ‘నూన్ చాయ్’ 43వ స్థానంలో నిలిచింది. ఇక మొదటిసారి తాగేవారికి ఈ నూన్ చాయ్ కాస్త వింతగా అనిపించినా, దీని టేస్ట్ మాత్రం చాలా యూనిక్గా ఉంటుంది.
భారతీయుల రోజువారీ జీవితంలో భాగమైన చాయ్, ఇప్పుడు ప్రపంచ వేదికపై దేశ కీర్తిని మరోసారి చాటిచెప్పింది. కాబట్టి, ఇంకెందుకు ఆలస్యం? ఈ గుడ్ న్యూస్ విన్నాక.. మీరు కూడా ఒక వేడి వేడి ‘గరం చాయ్ కీ ప్యాలీ’ చేతిలోకి తీసుకుని ఈ సంతోషాన్ని సెలబ్రేట్ చేసుకోండి!
గమనిక: ప్రసిద్ధ గ్లోబల్ ఫుడ్ రేటింగ్ ప్లాట్ఫారమ్ ‘టేస్ట్ అట్లాస్’ ప్రపంచవ్యాప్తంగా ఉన్న టీ ప్రియుల రేటింగ్లు, రివ్యూల ఆధారంగా ఈ జాబితాను రూపొందించింది.
