నైజీరియాలో మరోసారి తుపాకీ మోత మోగింది. ఉత్తర మధ్య నైజీరియా ప్రాంతంలోని బెన్యూ రాష్ట్రంలో ఉన్న ఉమోగిడి గ్రామంలో దారుణం చోటుచేసుకుంది. సాయుధులు రెండు సార్లు జరిపిన కాల్పుల్లో సుమారు 50 మంది దుర్మరణం చెందారు. మంగళవారం రోజున సాయుధులు మార్కెట్లో విచక్షణ రహితంగా కాల్పులు జరిపారు. ఈ ఘటనలో ముగ్గురు వ్యక్తులు మృతి చెందారు.
మరుసటి రోజు బుధవారం అదే ప్రాంతంలో దుండగుడులు మరోసారి రెచ్చిపోయారు. ఈ ఘటనలో 47 మంది ప్రాణాలు కోల్పోయారు. ఇందులో ఓ పోలీసు అధికారి కూడా ఉన్నారు. అయితే, ఈ దాడుల వెనుక ఉన్న ఉద్దేశం తెలియలేదు. కానీ ఈ రెండు ఘటనలకు సంబంధం ఉందని పోలీసులు భావిస్తున్నారు.
ఈ ఘటనపై కేసు నమోదు చేసుకున్న స్థానిక పోలీసులు దర్యాప్తు చేస్తున్నారు. ఈ కాల్పులకు ఇప్పటివరకు ఎవరూ బాధ్యత వహించలేదని తెలిపారు. అయితే, ఈ ప్రాంతంలో రైతులు, స్థానిక పశువుల కాపరుల మధ్య గొడవలు జరుగుతున్నాయని వెల్లడించారు. స్థానిక పశువుల కాపరులే ఈ దాడులకు పాల్పడి ఉండవచ్చని పోలీసులు అనుమానం వ్యక్తం చేస్తున్నారు.
