ఈ రోజుల్లో చిన్న ఆరోగ్య సమస్య వచ్చినా వెంటనే గూగుల్ లేదా AI చాట్బాట్లను అడగడం అలవాటుగా మారింది. కానీ, ఓ వ్యక్తి OpenAI తయారు చేసిన ChatGPT ని గుడ్డిగా నమ్మి ప్రాణాల మీదికి తెచ్చుకున్నాడు. వైద్యుడి దగ్గరికి వెళ్లకుండా AI చెప్పిన మాటలు విని తీవ్రమైన ఊపిరితిత్తుల వ్యాధి బారిన పడ్డాడు. దీంతో ఆగ్రహం చెందిన ఆయన ఏకంగా OpenAI కంపెనీపైనే కోర్టులో కేసు వేశారు. ప్రస్తుతం ఈ ఘటన ప్రపంచవ్యాప్తంగా పెద్ద సంచలనంగా మారింది.
అసలు ఏం జరిగింది?: అమెరికాలోని ఫ్లోరిడాకు చెందిన 55 ఏళ్ల పాస్టర్ స్కాట్ కొంతకాలంగా అనారోగ్యంతో బాధపడుతున్నారు. అయితే డాక్టర్ను సంప్రదించడానికి బదులు ఆయన ChatGPT ని వైద్య సలహా అడిగారు.
డాక్టర్ వద్దకు వెళ్లొద్దంది: స్కాట్ తన సమస్యను ఎన్నిసార్లు చెప్పినా… డాక్టర్ దగ్గరకు వెళ్లాల్సిన అవసరం లేదని, దేవుడే కాపాడతాడని మతపరమైన మాటలతో చాట్బాట్ ఆయనను నమ్మించింది. ఇక ఆయన కూడా దాని మాటలను గుడ్డిగా నమ్మి ఇంట్లోనే ఉండిపోయారు.
ప్రాణాల మీదికి తెచ్చిన నిర్లక్ష్యం: సమయానికి సరైన వైద్యం అందకపోవడంతో స్కాట్ అనారోగ్యం తీవ్రమైన లంగ్ డిసీజ్ (ఊపిరితిత్తుల వ్యాధి)గా మారింది. ఇక పరిస్థితి విషమించడంతో చాట్బాట్ తప్పుడు సమాచారం వల్లే తనకు ఈ గతి పట్టిందని ఆయన OpenAI పై అమెరికా కోర్టులో దావా వేశారు.
ఇక సాంకేతికత ఎంత పెరిగినా అది మనుషులకు సహాయం చేయడానికి మాత్రమే ఉపయోగపడుతుంది. వైద్యుల స్థానాన్ని AI ఎప్పటికీ భర్తీ చేయలేదు. కాబట్టి అనారోగ్యం వస్తే సొంత వైద్యాలు లేదా AI సలహాలు నమ్మకుండా వెంటనే డాక్టర్ను కలవడమే శ్రేయస్కరం.
గమనిక: AI చాట్బాట్లు ఇచ్చే సమాచారం కేవలం ప్రాథమిక అవగాహన కోసం మాత్రమే. ఆరోగ్య అత్యవసర పరిస్థితుల్లో ఎల్లప్పుడూ అర్హత కలిగిన వైద్యులను మాత్రమే సంప్రదించాలి.
