ఈ రోజుల్లో స్మార్ట్ఫోన్ వాడే ప్రతి ఒక్కరికీ ఇయర్ ఫోన్లు ప్రాణ స్నేహితులుగా మారిపోయాయి. పాటలు వినడానికైనా, సినిమా చూడటానికైనా వీటిని విరివిగా వాడుతుంటాం. అయితే, సరదాగానో లేదా అవసరానికో మన ఇయర్ ఫోన్లను ఇతరులకు ఇవ్వడం లేదా పక్కవారివి మనం వాడటం చేస్తుంటాం. చూడటానికి ఇది చిన్న విషయమే అనిపించినా, దీనివల్ల చెవికి సంబంధించి తీవ్రమైన ఇన్ఫెక్షన్లు వచ్చే ప్రమాదం ఉందని వైద్యులు హెచ్చరిస్తున్నారు. ఆ ప్రమాదాలేంటో, ఎలాంటి జాగ్రత్తలు తీసుకోవాలో ఇప్పుడు చూద్దాం.
ఇన్ఫెక్షన్లు వచ్చే ఛాన్స్ ఎక్కువ: మన శరీరంలోని ఇతర భాగాల లాగే చెవిలో కూడా సహజంగానే కొన్ని బ్యాక్టీరియాలు ఉంటాయి. ఒకరి ఇయర్ ఫోన్లు మరొకరు వాడినప్పుడు, ఆ వ్యక్తి చెవిలో ఉన్న బ్యాక్టీరియా లేదా ఫంగస్ మన చెవిలోకి సులభంగా చేరిపోతుంది. దీనివల్ల చెవి లోపల వాపు రావడం, తీవ్రమైన నొప్పి లేదా అలర్జీలు వచ్చే అవకాశం ఉంది. అందుకే ఇక ఇయర్ ఫోన్లను పర్సనల్ వస్తువులుగానే ఉంచుకోవడం మంచిది.
ఏ రకం ఇయర్ ఫోన్లు బెటర్?: మార్కెట్లో రకరకాల హెడ్ ఫోన్లు అందుబాటులో ఉన్నాయి. అయితే, చెవి లోపల వరకు వెళ్లే ‘ఇన్-ఇయర్’ హెడ్ ఫోన్ల కంటే, చెవి పైన పెట్టుకునే ‘ఓవర్-ఇయర్’ (Over-ear) హెడ్ ఫోన్లు వాడటం కొంచెం సురక్షితం. ఎందుకంటే ఇక ఇవి చెవి లోపలి సున్నితమైన భాగాలను నేరుగా తాకవు కాబట్టి ఇన్ఫెక్షన్ల భయం తక్కువగా ఉంటుంది.
క్లీనింగ్ చాలా ముఖ్యం: చాలామంది ఇయర్ ఫోన్లను కొన్నప్పటి నుండి ఒక్కసారి కూడా శుభ్రం చేయరు. కానీ, వాటి చివర ఉండే సిలికాన్ టిప్స్ మీద చెవిలోని మైనం, దుమ్ము పేరుకుపోతుంటాయి. వీటిని తరచుగా ఆల్కహాల్ ఆధారిత శానిటైజర్తో లేదా మెత్తటి గుడ్డతో క్లీన్ చేస్తూ ఉండాలి. ఇక ఇలా చేయడం వల్ల క్రిములు చేరకుండా ఉంటాయి.
ఇన్ఫెక్షన్ల మాట పక్కన పెడితే, ఇయర్ ఫోన్లలో గంటల తరబడి ఎక్కువ సౌండ్ పెట్టి వినడం వల్ల వినికిడి శక్తి తగ్గిపోయే ప్రమాదం ఉంది. అందుకే 60/60 రూల్ పాటించడం మంచిది. అంటే 60 శాతం వాల్యూమ్ కంటే తక్కువలో, రోజుకు 60 నిమిషాల కంటే ఎక్కువ సేపు వాడకుండా ఉంటే మీ చెవులు సురక్షితంగా ఉంటాయి.
గమనిక: మీకు చెవిలో దురద, నొప్పి లేదా వినికిడిలో తేడా అనిపిస్తే వెంటనే ఈఎన్టీ (ENT) డాక్టర్ను సంప్రదించండి. పైన చెప్పినవి కేవలం ప్రాథమిక అవగాహన కోసం మాత్రమే.
