ప్రాంతీయ పార్టీల వల్లే బీసీలకు న్యాయం జరుగుతుందని ఎమ్మెల్సీ కవిత అన్నారు. సోమవారం బీసీ సంఘాలు, యునైటెడ్ ఫూలే ఫ్రంట్, తెలంగాణ జాగృతి నేతలతో కలిసి కవిత డెడికేటెడ్ కమిషన్ బుసాని వెంకటేశ్వరరావుకు ‘బీసీల సమగ్ర అధ్యయన నివేదిక’ను అందజేశారు. ఈ సందర్భంగా ఆమె మాట్లాడుతూ.. రాజ్యాంగం ప్రకారం బీసీలకు హక్కులు కల్పించలేదన్నారు. ప్రాంతీయ పార్టీలు అధికారంలోకి వచ్చాక బీసీలకు న్యాయం జరిగిందన్నారు.
బీసీలకు రాజకీయ, ఆర్ధిక న్యాయం ప్రాంతీయ పార్టీలతోనే జరిగిందని, కులగణనకు వ్యతిరేకంగా బీజేపీ సుప్రీంకోర్టులో చెప్పిందని.. ఆ పార్టీ డీఎన్ఏలో బీసీ, ఎస్సీ, ఎస్టీలకు వ్యతిరేకమని వెల్లడించారు. బీసీలకు స్థానిక సంస్థల్లో 42 శాతం రిజర్వేషన్లు ఇస్తామని కాంగ్రెస్ హామీ ఇచ్చిందని, బీసీలకు హామీ ఇచ్చిన విధంగా కామారెడ్డి డిక్లరేషన్‌ను అమలు చేయాలన్నారు. 11 నెలల పాటు బీసీ డెడికేటెడ్ కమిషన్ ఏర్పాటు చేయని కాంగ్రెస్.. నెల రోజుల్లో డెడికేటెడ్ కమిషన్ రిపోర్ట్ ఎలా ఇస్తుందని ఆమె ప్రశ్నించారు. కులగణన కోర్టుల్లో నిలబడుతుందా? అనేది ప్రభుత్వం చెప్పాలన్నారు.బీసీల అనుమానాలను కాంగ్రెస్ ప్రభుత్వం నివృత్తి చేయాలని సూచించారు. హైదరాబాద్, రంగారెడ్డి జిల్లాల్లో అనేక చోట్ల ఇంటికి కుల గణన స్టిక్కర్లు అంటించలేదన్నారు.
