ఉదయాన్నే లేవగానే విపరీతమైన బద్ధకం, కుర్చీలోంచి లేచినా తలదిమ్ముగా తిరగడం, కళ్లు మసకబారడం వంటి లక్షణాలతో ఇబ్బంది పడుతున్నారా? సాధారణంగా హైబీపీ గురించి మాట్లాడేంతగా లో బీపీ (హైపోటెన్షన్) గురించి ఎవరూ చర్చించరు. కానీ శరీరంలోని అవయవాలకు సరిగ్గా రక్త సరఫరా జరగకపోవడం వల్ల వచ్చే ఈ లో బీపీ కూడా తీవ్రమైన సమస్యే. అసలు లో బీపీ ఎందుకు వస్తుంది? దాని లక్షణాలు ఏంటో ఇప్పుడు తెలుసుకుందాం..
లో బీపీ అంటే ఏమిటి?: వైద్య శాస్త్రం ప్రకారం రక్తం యొక్క సిస్టోలిక్, డయాస్టోలిక్ ఒత్తిడి సాధారణ స్థాయి కంటే బాగా పడిపోవడాన్ని ‘హైపోటెన్షన్’ లేదా లో బీపీ అంటారు. మహిళల్లో రీడింగ్ 100/60 mmHg కంటే తక్కువగా, అలాగే పురుషుల్లో 110/70 mmHg కంటే తక్కువగా నమోదైతే లో బీపీ ఉన్నట్లు పరిగణిస్తారు. మన దేశంలో ముఖ్యంగా మహిళలు ఆరోగ్య పరీక్షలు చేయించుకోకపోవడం వల్ల ఈ సమస్య ముదిరే వరకు తెలియడం లేదు.
లో బీపీ రావడానికి ప్రధాన కారణాలు: శరీరంలో తగినంత నీరు లేకపోవడం వాంతులు, విరేచనాలు కావడం వల్ల లో బీపీ రావచ్చు. అలాగే తీవ్రమైన రక్తస్రావం కావడం, విటమిన్ బి12 లోపం, గుండె సంబంధిత రుగ్మతలు, ప్రెగ్నెన్సీ, హైబీపీకి వాడే మందుల మోతాదు ఎక్కువ కావడం మరియు అడ్రినలైన్ హార్మోన్ అసమతుల్యత కూడా లో బీపీకి కారణమవుతాయి.
కనిపించే ప్రధాన లక్షణాలు: అలసట, తరచూ తలనొప్పి రావడం, కళ్లు తిరగడం, వికారం, శ్వాస తీసుకోవడంలో ఇబ్బంది ఉండటం లో బీపీకి ముఖ్య సంకేతాలు. ఇక శరీరంలో సరిపడా రక్తం లేనప్పుడు లేదా రక్త ప్రసరణ తగ్గినప్పుడు మెదడుకు, ఇతర అవయవాలకు ఆక్సిజన్ సరఫరా తగ్గి శరీరం ఒక్కసారిగా షాక్కు గురైనట్లు అవుతుంది.
పాటించాల్సిన జాగ్రత్తలు: లో బీపీ లక్షణాలు కనిపిస్తే వెంటనే వైద్యుడిని సంప్రదించాలి. ప్రతిరోజూ సరిపడా నీరు తాగడం, రక్తాన్ని పెంచే పోషకాహారాన్ని తీసుకోవడం చాలా ముఖ్యం. ఇక మానసిక ఒత్తిడికి దూరంగా ఉంటూ రోజువారీగా చిన్నపాటి వ్యాయామాలు చేయడం వల్ల రక్త ప్రసరణ మెరుగుపడి బీపీ సాధారణ స్థితికి వస్తుంది.
లో బీపీ సమస్యను తేలిగ్గా తీసిపారేయకూడదు. సకాలంలో సరైన జీవనశైలి మార్పులు, సమతుల్యమైన ఆహారం తీసుకోవడం ద్వారా ఈ సమస్య నుంచి సులభంగా బయటపడి ఆరోగ్యంగా ఉండవచ్చు.
గమనిక: పైన ఇచ్చిన సమాచారం కేవలం అవగహన కోసం మాత్రమే, హఠాత్తుగా కళ్లు తిరిగి పడిపోవడం లేదా విపరీతమైన నీరసం అనిపిస్తే, వెంటనే సమీపంలోని ఆసుపత్రికి వెళ్లి బిపిని పరీక్షించుకుని తగిన చికిత్స పొందడం శ్రేయస్కరం.
