సాధారణంగా తలనొప్పి అంటే పెద్దలకే వస్తుందని మనం అనుకుంటాం. అయితే, ప్రస్తుత కాలంలో చిన్నపిల్లలు కూడా తీవ్రమైన మైగ్రేన్ సమస్యతో ఇబ్బంది పడుతున్నారు. పిల్లలు తమకు నొప్పిగా ఉందని సరిగ్గా చెప్పలేక చిరాకు పడటం లేదా వాంతులు చేసుకోవడం వంటివి చేస్తుంటారు. దీన్ని చాలామంది సాధారణ తలనొప్పి అని నిర్లక్ష్యం చేస్తారు. అసలు చిన్నపిల్లల్లో మైగ్రేన్ రావడానికి కారణాలేంటి? ప్రారంభ దశలోనే దీన్ని ఎలా గుర్తించి నియంత్రించాలో ఇప్పుడు వివరంగా తెలుసుకుందాం.
పిల్లల్లో మైగ్రేన్ రావడానికి కారణాలు: చిన్నపిల్లల్లో మైగ్రేన్ రావడానికి రకరకాల కారణాలు ఉండవచ్చు. మీకు తెలుసా? కుటుంబంలో ఎవరికైనా మైగ్రేన్ ఉంటే అది పిల్లలకు వచ్చే అవకాశం ఎక్కువగా ఉంటుంది. దీనితో పాటు మారుతున్న జీవనశైలి కూడా ప్రధాన కారణమే. ఇక చదువుల ఒత్తిడి లేదా పరీక్షల భయం. అంతేకాక స్కూల్ హోంవర్క్ లేదా మొబైల్ ఫోన్ల వాడకం వల్ల నిద్ర తగ్గడం.
ఆహారపు అలవాట్లు: జంక్ ఫుడ్, చాక్లెట్లు, ఐస్ క్రీములు లేదా ఎక్కువగా నిల్వ ఉంచిన ఆహార పదార్థాలు తినడం. తగినంత నీరు తాగకపోవడం వల్ల కూడా తలనొప్పి రావచ్చు.
ప్రారంభ దశలో గుర్తించడం ఎలా: పెద్దల మైగ్రేన్ లక్షణాలకు, పిల్లల లక్షణాలకు కొంత తేడా ఉంటుంది. ఇక పోతే, పిల్లల్లో తలనొప్పితో పాటు కడుపునొప్పి రావడం ఒక ముఖ్యమైన సంకేతం. అసలు విషయం ఏమిటంటే, పిల్లలు వెలుతురును లేదా గట్టి శబ్దాలను భరించలేకపోతుంటే, వారు చీకటి గదిలో ఉండాలని కోరుకుంటుంటే అది మైగ్రేన్ కావచ్చు. కొన్నిసార్లు నొప్పి వచ్చే ముందు కళ్ల ముందు మెరుపులు కనిపించడం (Aura) లేదా వికారం వంటి లక్షణాలు కనిపిస్తాయి.
నియంత్రించే మార్గాలు: మైగ్రేన్ను ప్రారంభంలోనే అరికట్టడానికి మందుల కంటే జీవనశైలి మార్పులు ఎంతో మేలు చేస్తాయి. సరైన నిద్ర అవసరం, పిల్లలు రోజుకు కనీసం 8-9 గంటలు ప్రశాంతంగా నిద్రపోయేలా చూడాలి.ముఖ్యంగా స్క్రీన్ టైమ్ తగ్గించడం నేర్చుకోవాలి. టీవీ, మొబైల్ ఫోన్ల వాడకాన్ని వీలైనంత వరకు పరిమితం చేయాలి.
ఆరోగ్యకరమైన ఆహారం: సమయానికి భోజనం చేయడం, పండ్లు, ఆకుకూరలు ఎక్కువగా ఇవ్వడం ద్వారా మైగ్రేన్ తీవ్రతను తగ్గించవచ్చు. అంతేకాక యోగా మరియు వ్యాయామంపై దృష్టి పెట్టాలి. శారీరక శ్రమ మరియు బ్రీతింగ్ వ్యాయామాలు ఒత్తిడిని తగ్గించి మైగ్రేన్ రాకుండా చేస్తాయి.
పిల్లల్లో వచ్చే మైగ్రేన్ విషయంలో తల్లిదండ్రుల అప్రమత్తత చాలా ముఖ్యం. వారి తలనొప్పిని కేవలం సాకుగా చూడకుండా, దానికి గల మూల కారణాన్ని వెతకాలి. ప్రేమతో కూడిన వాతావరణం, క్రమశిక్షణతో కూడిన జీవనశైలి ఉంటే పిల్లలు ఈ సమస్య నుంచి త్వరగా బయటపడతారు.
గమనిక: పైన ఇచ్చిన సమాచారం కేవలం అవగాహన కోసం మాత్రమే, పిల్లలకు తరచూ తలనొప్పి వస్తుంటే నిపుణులైన పీడియాట్రిషియన్ను కలిసి, అవసరమైతే కంటి పరీక్షలు కూడా చేయించడం మంచిది.
