అత్యంత వేగంగా విస్తరిస్తున్నా కరోనా మహమ్మారి ప్రపంచ దేశాలకు కంటి మీద కునుకు లేకుండా చేస్తోంది. అలాంటి వైరస్‌ గురించి.. పరిశోధనలు కొనసాగుతూనే ఉన్నాయి. కరోనా సోకిన వ్యక్తి తుమ్మినా, దగ్గినా.. ఈ వైరస్‌ గాల్లో కలిసి వేరే వాళ్లకి సోకే అవకాశం ఉంది. అయితే ఇదివరకు ఇది గాల్లో ఒక మీటర్‌ మాత్రమే ప్రయాణించగలదని అంతా భావించారు. ఈ మేరకు మీటర్‌ మేర సామాజిక దూరం పాటిస్తే కరోనాను కట్టడి చేయవచ్చని ప్రపంచ ఆరోగ్య సంస్థ సూచనలు జారీ చేసింది. అయితే తాజా పరిశోధనలు మాత్రం ప్రపంచ ఆరోగ్య సంస్థ చేసిన సూచనలు ఏ మేరకు కరోనా కట్టడికి ఉపయోగపడతాయనే సందేహాలు లేవనెత్తుతున్నాయి.
మసాచుసెట్స్‌ ఇనిస్టిట్యూట్‌ ఆఫ్‌ టెక్నాలజీ జరిపిన పరిశోధనల్లో కరోనా వైరస్‌ గాలిలో నాలుగు గంటల పాటు జీవించి ఉంటుందని తేలింది. దగ్గినప్పుడు, తమ్మినప్పుడు. నోరు, ముక్కు నుంచి బయటకు వచ్చే తుంపరలను కలుపుకుని ఈ వైరస్‌ 23 నుంచి 27 అడుగుల దూరం(7-8 మీటర్లు) ప్రయాణిస్తుందని ఆ పరిశోధనల్లో వెల్లడైంది. జర్నల్‌ ఆఫ ది అమెరికన్‌ మెడికల్‌ అసోషియేషన్‌ తాజా సంచికలో మసాచుసెట్స్‌ శాస్త్రవేత్తల పరిశోధనలకు సంబంధించిన వివరాలను ప్రచురించారు. 1930లో జరిపిన పరిశోధనలకు అనుగుణంగా ప్రపంచ ఆరోగ్య సంస్థ ఒక మీటరు సామాజిక దూరం ప్రతిపాదించిందని.. కానీ ఇప్పుడు వైరస్‌లు బలపడటంతో ఆ దూరం సరిపోదని పరిశోధనల్లో పాల్గొన్న అసోసియేట్‌ ప్రొఫెసర్‌ లిడియా బౌరౌబా తెలియజేశారు.
