భార‌త మ‌హిళా వన్డే జ‌ట్టు కెప్టెన్ మిథాలీ రాజ్ మ‌రో చారిత్రాత్మ‌క మైలురాయికి చేరుకుంది. వ‌న్డేల‌లో 7వేల ప‌రుగులు చేసిన తొలి మ‌హిళా క్రికెట‌ర్‌గా చ‌రిత్ర సృష్టించింది. ఆదివారం ల‌క్నోలో సౌతాఫ్రికా మ‌హిళ‌ల జ‌ట్టుతో జరిగిన 3వ వన్డే మ్యాచ్‌లో ఆమె ఈ ఘ‌న‌త సాధించింది. మ్యాచ్ ప్రారంభానికి ముందు ఆమె ఖాతాలో 6,974 వన్డే ప‌రుగులు ఉన్నాయి. ఈ క్ర‌మంలోనే ఆమె మ్యాచ్‌లో మ‌రో 26 ప‌రుగులు చేసి ఈ ఘ‌న‌త సాధించింది. ఆమెకు ఇది 213వ వన్డే కావ‌డం విశేషం.
కాగా మ్యాచ్‌లో మిథాలి రాజ్ 71 బంతుల్లో 45 ప‌రుగులు చేసి అర్ధ సెంచ‌రీ చేయ‌కుండానే ఔట్ అయింది. త‌న ఇన్నింగ్స్‌లో ఆమె 4 ఫోర్లు కొట్టింది. ఇక మ్యాచ్‌లో భార‌త మ‌హిళ‌ల జ‌ట్టు నిర్ణీత 50 ఓవ‌ర్ల‌లో 4 వికెట్ల న‌ష్టానికి 266 ప‌రుగులు చేసింది. ప్ర‌స్తుతం సౌతాఫ్రికా జ‌ట్టు బ్యాటింగ్ కొన‌సాగుతోంది. ఆ జ‌ట్టు 26.2 ఓవ‌ర్ల‌లో 1 వికెట్ న‌ష్టానికి 128 ప‌రుగుల స్కోరు వ‌ద్ద కొన‌సాగుతోంది.
ఇక 10వేల అంత‌ర్జాతీయ ప‌రుగుల‌ను పూర్తి చేసుకున్న తొలి ఇండియా వుమ‌న్ క్రికెట‌ర్‌గా కూడా మిథాలీ పేరుగాంచింది. ప్ర‌పంచ వ్యాప్తంగా చూస్తే ఆ ఫీట్ సాధించిన రెండో క్రీడాకారిణిగా ఆమె నిలిచింది. వ‌న్డేలు కాకుండా 10 టెస్టుల‌లో ఆమె 663 ప‌రుగులు చేయ‌గా ఆమె స‌గ‌టు 51గా ఉంది. అలాగే టీ20ల‌లో ఆమె 89 మ్యాచ్‌ల‌లో 37.52 స‌గ‌టుతో 2364 ప‌రుగులు చేసింది.
