ఎయిరిండియా విమానంలో మరో షాకింగ్ ఘటన చోటుచేసుకుంది. మద్యం మత్తులో ఓ మహిళపై మూత్ర విసర్జన ప్రయాణికుడిని పట్టుకొనేందుకు పోలీసులు గాలిస్తున్న నేపథ్యంలో మరో ఘటన వెలుగులోకి వచ్చింది. డిసెంబర్‌ 6న పారిస్‌-దిల్లీ విమానంలో తప్పతాగిన ఓ వ్యక్తి తోటి మహిళా ప్రయాణికురాలి దుప్పటిపై మూత్ర విసర్జన చేశాడు. ఏ తరగతిలో ఈ దుశ్చర్య జరిగిందన్న విషయం మాత్రం తెలియలేదు.
డిసెంబరు 6న ఉదయం 9:40 గంటలకు విమానం దిల్లీ విమానాశ్రయంలో ల్యాండ్‌ అయింది. మద్యం మత్తులో ఉన్న నిందితుడు క్యాబిన్‌ సిబ్బంది సూచనల్ని పట్టించుకోలేదని, అంతేకాకుండా ఓ మహిళా ప్రయాణికురాలి దుప్పటిపై మూత్రం పోసినట్టు భద్రతా సిబ్బందికి సమాచారం అందింది. దీంతో అతడు విమానం దిగగానే సీఐఎస్‌ఎఫ్‌ సిబ్బంది అతడిని అదుపులోకి తీసుకున్నారు.
అనంతరం ఆ ప్రయాణికులిద్దరి మధ్య రాజీ కుదరడం, నిందితుడు లిఖితపూర్వకంగా క్షమాపణలు చెప్పడంతో విడిచిపెట్టినట్టు తెలిపారు. తొలుత రాతపూర్వకంగా ఫిర్యాదు చేసిన మహిళ.. పోలీసు కేసు పెట్టేందుకు నిరాకరించడంతో ఇమ్మిగ్రేషన్‌, కస్టమ్స్‌ ఫార్మాలటీలను పూర్తి చేసి నిందితుడిని వదిలేసినట్టు ఎయిర్‌పోర్టు అధికారులు తెలిపారు.
