బిహార్ లో కొత్తగా ఎన్డీఏతో కలిసి ప్రభుత్వం ఏర్పాటు చేసిన సీఎం నితీశ్ కుమార్ బలపరీక్ష సమీపిస్తున్న కొద్దీ ఆ రాష్ట్ర రాజకీయాలు క్షణక్షణం మారుతున్నాయి. బలపరీక్షలో నెగ్గి ఎన్డీఏతో కలిసి ప్రభుత్వాన్ని కొనసాగించాలని నీతీశ్ కుమార్ నేతృత్వంలోని జేడీయూ ఉవ్విళ్లూరుతోంది. మరోవైపు విశ్వాస పరీక్షలో నీతీశ్ను ఓడించి, తాము ప్రభుత్వం ఏర్పాటు చేయాలని ఆర్జేడీ, కాంగ్రెస్ మహా కూటమి వ్యూహాలు రచిస్తోంది. బలపరీక్షలో నీతీశ్ ను ఎలాగైనా ఓడించాలని ఆర్జేడీ అధినేత లాలూ ప్రసాద్ యాదవ్ తీవ్రంగా గ్రౌండ్ వర్క్ చేస్తున్నట్లు ఊహాగానాలు వెలువడుతున్నాయి.
ఈ నేపథ్యంలో జేడీయూ ఎమ్మెల్యేలు పార్టీ నేత ఇచ్చిన విందుకు గైర్హాజరు కావడం ప్రస్తుతం చర్చనీయాంశమవుతోంది. తమ సామర్థ్యాన్ని నిరూపించుకోవడానికి మంత్రి శ్రవణ్ కుమార్ విప్ జారీ చేసి మరీ జేడీయూ ఎమ్మెల్యేలను విందుకు ఆహ్వానించగా దాదాపు 10 మంది జేడీయూ ఆ పార్టీకి గైర్హాజరైనట్లు తెలుస్తోంది. వీరికి ఆర్జేడీ వల వేసినట్లు విశ్వసనీయ వర్గాల సమాచారం. అయితే దీనిపై స్పందించిన జేడీయూ నేతలు తామంతా ఐక్యంగా ఉన్నామని, నీతీశ్ కుమార్కు అండగా నిలుస్తామని స్పష్టం చేశారు.
