నూతన సంవత్సర వేడుకలకు భారత్ ముస్తాబవుతోంది. ఈ ఏడాదిలో చివరి రోజైన ఈరోజుకు గ్రాండ్‌గా గుడ్ బై చెప్పేందుకు ప్రజలు వివిధ రకాల ప్లాన్‌లు వేసుకుంటున్నారు. ఇప్పటికే న్యూ ఇయర్ ఈవెంట్స్‌తో దేశవ్యాప్తంగా సందడి షురూ అయింది. ఈ న్యూ ఇయర్ వేళ దేశ ఆర్థిక రాజధాని ముంబయి మాత్రం భయంతో వణికిపోతోంది. ముంబయిలో బాంబు బెదిరింపు కాల్స్‌ కలకలం రేపుతున్నాయి. కొత్త సంవత్సరానికి ఘనంగా స్వాగతం పలకాడానికి ఎదురు చూస్తున్న ప్రజలను ఈ వార్తలతో భయాందోళనకు గురవుతున్నారు.
నగరంలోని పలు ప్రాంతాల్లో బాంబులు పెట్టినట్లు శనివారం సాయంత్రం 6 గంటల సమయంలో గుర్తు తెలియని ఓ వ్యక్తి ముంబయి పోలీస్‌ కంట్రోల్‌ రూమ్‌కు ఫోన్‌ చేశాడు. న్యూఇయర్‌ వేడుకలు జరుగుతున్న వేళ అవి ఏ క్షణంలోనైనా పేలిపోవచ్చని వార్నింగ్ ఇచ్చాడు. ఈ కాల్‌తో నగర పోలీసులు అప్రమత్తమై ముంబయి అంతా విస్తృతంగా గాలింపు చేపట్టారు. ఎలాంటి అనుమానాస్పద వస్తువులు దొరకలేదని పోలీసులు తెలపడంతో అంతా ఊపిరి పీల్చుకున్నారు. అయితే ఫోన్‌ చేసిన వ్యక్తిని గుర్తించేందుకు పోలీసులు ప్రయత్నిస్తున్నారు.
