ఇండియన్ నేవీ మరోసారి సముద్ర దొంగల ఆటకట్టించింది. అరేబియా సముద్రంలో హైజాక్‌కు గురైన ఇరాన్‌కు చెందిన చేపల బోటును రక్షించింది. అందులోని దాదాపు 23 మంది పాకిస్థానీ సిబ్బందిని సురక్షితంగా కాపాడింది. సముద్రాల్లో యాంటీ పైరసీలో భాగంగా ఈ ప్రత్యేక ఆపరేషన్ చేపట్టినట్లు భారత నౌకాదళ అధికారులు తెలిపారు.
గల్ఫ్‌ ఏడెన్‌కు సమీపంలో ఉన్న సోకోట్రా ద్వీప సమూహానికి 90 నాటికల్‌ మైళ్ల దూరంలో గురువారం రోజున ఇరాన్‌కు చెందిన చేపల ‘ఏఐ- కంబార్’ బోటును పైరేట్స్ హైజాక్‌ చేశారు. తొమ్మిది మంది పైరేట్స్ (సముద్ర దొంగలు) పడవను తమ ఆధీనంలోకి తీసుకున్నారు. దీనికి సంబంధించి ఇండియన్ నేవీకి సమాచారం అందడంతో రంగంలోకి దిగిన భారత్ నౌకదళం ఆ బోటును, సిబ్బందిని రక్షించేందుకు ప్రత్యేక ఆపరేషన్ చేపట్టింది. తొలుత ఐఎన్‌ఎస్‌ సుమేధా సముద్ర దొంగల అదుపులో ఉన్న బోటును అడ్డగించి, ఆ తర్వాత ఆపరేషన్లో చేరిన ఐఎన్‌ఎస్‌ త్రిశూల్‌ నౌక సంయుక్తంగా దొంగల ఆట కట్టించాయి. దాదాపు 12 గంటల ప్రత్యేక ఆపరేషన్ అనంతరం బోటులో ఉన్న పైరేట్లు లొంగిపోయారు. 23 మంది పాకిస్థాన్‌ జాతీయులు సురక్షితంగా రక్షించినట్లు భారత్ నేవీ వెల్లడించింది.
