గుజరాత్లో ఘోర రోడ్డు ప్రమాదం జరిగింది. ఈ ఘటనలో తొమ్మిది మంది దుర్మరణం చెందారు. సమాచారం అందుకున్న పోలీసులు ఘటనాస్థలికి చేరుకుని సహాయక చర్యలు చేపట్టారు. క్షతగాత్రులను స్థానిక ఆస్పత్రికి తరలించారు.
పోలీసులు తెలిపిన వివరాల ప్రకారం.. బుధవారం రోజున అర్ధరాత్రి ఈ ఘటన చోటు చేసుకుంది. మొదట మహీంద్రా కారు, డంపర్‌ ఢీ కొన్నాయి. ఆ తర్వాత ప్రమాదాన్ని చూసేందుకు గుమి కూడిన ప్రజలపైకి గంటకు 160 కిలో మీటర్ల వేగంతో వస్తున్న జాగ్వార్ కారు దూసుకెళ్లింది. ఈ ఘటనలో తొమ్మిది మంది చనిపోయారు. అనేక మంది గాయపడ్డారు. మృతులు బొటాడ్, సురేంద్రనగర్‌కు చెందిన యువకులుగా గుర్తించారు. మృతుల్లో కానిస్టేబుల్, హోంగార్డు కూడా ఉన్నారు. సమాచారం అందుకున్న అధికారులు ఘటనాస్థలికి చేరుకున్నారు. గాయపడిన వారిని సోలా సివిల్ ఆస్పత్రికి తరలించారు. మృతదేహాలను పోస్టుమార్టం నిమిత్తం స్థానిక ప్రభుత్వ ఆస్పత్రికి తరలించినట్లు పోలీసులు తెలిపారు. ప్రమాదానికి సంబంధించి పూర్తి వివరాలు తెలియాల్సి ఉంది.
