బిహార్ ముఖ్యమంత్రి నితీష్ కుమార్ కు పట్నా హై కోర్టు షాక్ ఇచ్చింది. ఆ రాష్ట్రంలో జరుగుతున్న కుల గణన, ఆర్థిక సర్వేపై పట్నా హైకోర్టు స్టే విధించింది. రాష్ట్రంలో జరుగుతున్న కుల గణనను తక్షణమే నిలిపివేయాలని.. ఇప్పటివరకు సేకరించిన సమాచారాన్ని భద్రంగా ఉంచాలని.. ఎవ్వరితోనూ పంచుకోవద్దని ప్రభుత్వాన్ని ఆదేశించింది.
ఈ మేరకు ప్రధాన న్యాయమూర్తి జస్టిస్ కేవీ చంద్రన్, జస్టిస్ మధురేశ్ ప్రసాద్ తో కూడిన డివిజన్ బెంచ్.. గురువారం మధ్యంతర ఉత్తర్వులు జారీ చేసింది. ఈ ఉత్తర్వులు జులై 3 వరకు అమలులో ఉండనున్నాయి. ఈ కేసులో తదుపరి విచారణను జులై 7కు కోర్టు వాయిదా వేసింది.
“ఈ సర్వేలో సేకరించిన సమాచారం సమగ్రత, భద్రతకు సంబంధించిన ప్రశ్నలున్నాయి. ఈ విషయంపై రాష్ట్ర ప్రభుత్వం దృష్టి సారించాలి. కుల ఆధారిత సర్వేను నిర్వహించే అధికారం లేదని మేము అభిప్రాయపడుతున్నాము. ఇది జనాభా లెక్కల లానే ఉంది. యూనియన్ పార్లమెంట్ శాసనాధికారంపై ఇది ప్రభావం చూపుతుంది” అని హైకోర్టు వ్యాఖ్యానించింది.
