కొత్త ఆర్థిక సంవత్సరం మొదలవుతుందంటే చాలు.. ఆదాయపు పన్ను, బ్యాంకింగ్ రంగాల్లో బోలెడు మార్పులు వస్తుంటాయి. ఈసారి కేంద్ర ప్రభుత్వం పాన్ కార్డు దరఖాస్తు నిబంధనలను పూర్తిగా మార్చేస్తోంది. ఇప్పటివరకు కేవలం ఆధార్ కార్డు ఉంటే చిటికెలో పాన్ వచ్చేసేది, కానీ ఏప్రిల్ 1 నుంచి సీన్ మారిపోనుంది. మీరు కొత్తగా పాన్ కార్డు తీసుకోవాలన్నా లేదా పాత దానిలో మార్పులు చేయాలన్నా కొత్త రూల్స్ ఏంటో తెలుసుకోవడం చాలా ముఖ్యం. ఆ వివరాలేంటో ఇప్పుడు క్లియర్ గా చూద్దాం..
ఒక్క ఆధార్ ఉంటే సరిపోదు: ఇప్పటివరకు ఆధార్ కార్డు ఒక్కటి ఇస్తే చాలు, అదనపు డాక్యుమెంట్లు ఏమీ లేకుండానే పాన్ కార్డు దరఖాస్తు చేసుకునే సదుపాయం ఉండేది. కానీ మార్చి 31తో ఈ వెసులుబాటు ముగియనుంది. ఏప్రిల్ 1 నుంచి ఆధార్తో పాటు కచ్చితంగా మరో గుర్తింపు కార్డును (ID Proof) సమర్పించాల్సి ఉంటుంది. అంటే ఓటర్ ఐడీ, పాస్పోర్ట్ లేదా డ్రైవింగ్ లైసెన్స్ వంటి అదనపు పత్రాలు దగ్గర పెట్టుకోవాలి.
మారనున్న అప్లికేషన్ ఫార్మాట్: కొత్త నిబంధనల ప్రకారం పాన్ కార్డు దరఖాస్తు చేసుకునే ఫారాలు కూడా మారిపోతున్నాయి. పాత అప్లికేషన్ ఫార్మాట్ను రద్దు చేసి, మరింత సమాచారంతో కూడిన కొత్త ఫారాలను ప్రభుత్వం తీసుకురానుంది. మీరు వివరాలు అప్డేట్ చేయాలనుకున్నా సరే, ఇకపై ఈ కొత్త ఫారాలనే వాడాల్సి ఉంటుంది. పాత పద్ధతిలో చేసే అప్లికేషన్లను అధికారులు స్వీకరించరు.
ఆధార్ వివరాలే కీలకం: ఇకపై పాన్ కార్డులో మీ పేరు, పుట్టిన తేదీ వంటి వివరాలు ఖచ్చితంగా మీ ఆధార్ కార్డులో ఉన్నట్టే ఉండాలి. ఒకవేళ మీ ఆధార్లో తప్పులు ఉంటే, ముందుగా వాటిని సరిచేసుకోవడం మంచిది. ఎందుకంటే ఆధార్ డేటా ఆధారంగానే పాన్ వెరిఫికేషన్ జరుగుతుంది కాబట్టి, రెండు కార్డుల్లో వివరాలు మ్యాచ్ అవ్వకపోతే మీ అప్లికేషన్ రిజెక్ట్ అయ్యే అవకాశం ఉంది.
ఈ-పాన్ డౌన్లోడ్ పేరుతో జాగ్రత్త: కొత్త రూల్స్ వస్తున్న నేపథ్యంలో సైబర్ నేరగాళ్లు రెచ్చిపోతున్నారు. “సెకన్లలో ఈ-పాన్ డౌన్లోడ్ చేసుకోండి” అంటూ వాట్సాప్, ఎస్సెమ్మెస్ ద్వారా స్పామ్ లింకులు పంపిస్తున్నారు. ఆ లింక్లు క్లిక్ చేస్తే మీ ఫోన్లోకి వైరస్ ప్రవేశించి మీ బ్యాంక్ వివరాలు చోరీ చేసే ప్రమాదం ఉంది. ఆదాయపు పన్ను శాఖ ఇలాంటి లింకులు ఎప్పుడూ పంపదని గుర్తుంచుకోండి.
ప్రభుత్వ అధికారిక వెబ్సైట్లే నమ్మదగినవి: పాన్ కార్డుకు సంబంధించి ఏదైనా పని ఉంటే నేరుగా NSDL లేదా UTITSL వంటి ప్రభుత్వ అధికారిక వెబ్సైట్ల ద్వారా మాత్రమే పూర్తి చేయండి. బయట వ్యక్తులకు లేదా తెలియని యాప్స్కు మీ వ్యక్తిగత వివరాలు ఇవ్వకండి. ఇక మోసపూరిత లింకులు కనిపిస్తే వెంటనే సైబర్ క్రైమ్ పోలీసులకు ఫిర్యాదు చేయడం మంచిది.
పాన్ కార్డు అనేది ఆర్థిక లావాదేవీలకు చాలా ముఖ్యం. అందుకే ప్రభుత్వం తెస్తున్న ఈ కొత్త మార్పులను గమనించి, గడువులోపు మీ పనులు పూర్తి చేసుకోవడం ఉత్తమం. ఏప్రిల్ 1 తర్వాత కొత్త డాక్యుమెంట్ల గొడవ లేకుండా ఉండాలంటే ఇప్పుడే అప్రమత్తం అవ్వండి.
