మన శరీరాన్ని ఒక బిల్డింగ్తో పోలిస్తే, దానికి ఇటుకలు ఎలాగో.. మన శరీరానికి ప్రోటీన్ అలాగన్నమాట. కండరాలు పెరగాలన్నా, జుట్టు మెరవాలన్నా, గాయాలు త్వరగా మానాలన్నా ప్రోటీన్ తప్పనిసరి. కానీ మనలో చాలామందికి అసలు రోజుకు ఎంత ప్రోటీన్ తినాలో తెలియదు. న్యూట్రీషియన్స్ సూచనల ప్రకారం.. మీ వయసు మరియు బరువును బట్టి మీకు ఎంత ప్రోటీన్ కావాలో, అది ఎందుకు ముఖ్యమో తెలుసుకుందాం..
శరీరానికి ప్రోటీన్ ఎందుకు ముఖ్యం?: ప్రోటీన్ అనేది కేవలం బాడీ బిల్డర్లకు మాత్రమే కాదు, ప్రతి ఒక్కరికీ అవసరం. మన కండరాలు, ఎముకలు, చర్మం, జుట్టు.. ఇవన్నీ ప్రోటీన్తోనే తయారవుతాయి. అంతేకాకుండా బాడీలో ఎంజైమ్స్, హార్మోన్లు సరిగ్గా పనిచేయాలన్నా, రోగనిరోధక శక్తి పెరగాలన్నా ప్రోటీన్ కచ్చితంగా ఉండాలి. ఇది కణజాలాలను రిపేర్ చేయడంలో మేస్త్రీలా పనిచేస్తుంది.
వయసును బట్టి ప్రోటీన్ లెక్కలు: ప్రతి వయసులో అవసరాలు వేరుగా ఉంటాయి. వేగంగా పెరిగే శిశువులకు కిలో బరువుకు 1.2 – 1.5 గ్రాముల ప్రోటీన్ అవసరం. ఎదిగే పిల్లలకు 1.0 – 1.2 గ్రాములు, టీనేజర్లకు సుమారు 1.0 గ్రాము కావాలి. ఇక ఆరోగ్యవంతులైన పెద్దలకు కిలోకు 0.8 నుంచి 1.0 గ్రాము సరిపోతుంది. ఇక వృద్ధులకు కండరాల క్షీణత తగ్గించడానికి కొంచెం ఎక్కువగా (1.2 గ్రాముల వరకు) అవసరమవుతుంది.
మీ బరువును బట్టి ఎలా లెక్కించాలి?: మీకు ఎంత ప్రోటీన్ కావాలో తెలుసుకోవడం చాలా ఈజీ. మీ బరువును 0.8 లేదా 1.0తో మల్టీప్లై చేయండి. ఉదాహరణకు మీ బరువు 60 కేజీలు అనుకుంటే.. 60 x 0.8 = 48 గ్రాముల ప్రోటీన్ మీకు కనీసం అవసరం. ఇక మీరు వ్యాయామం చేసేవారైతే లేదా బరువు తగ్గాలనుకుంటే ఈ మోతాదు కిలోకు 1.2 నుండి 1.6 గ్రాముల వరకు పెరగవచ్చు.
గర్భిణీలు మరియు బాలింతలకు ప్రత్యేకం: గర్భిణీ స్త్రీలకు మరియు పాలిచ్చే తల్లులకు సాధారణం కంటే ఎక్కువ ప్రోటీన్ అవసరం. శిశువు ఎదుగుదల కోసం వీరు రోజుకు సుమారు 70-71 గ్రాముల ప్రోటీన్ తీసుకోవాలని నిపుణులు సూచిస్తున్నారు. ఇక ఇది వారి శరీరంలోని క్యాలరీలలో దాదాపు 10 నుండి 35 శాతం వరకు ఉండాలి.
బరువు తగ్గడంలో ప్రోటీన్ పాత్ర: బరువు తగ్గాలనుకునే వారు కార్బోహైడ్రేట్లు తగ్గించి, ప్రోటీన్ పెంచాలి. ప్రోటీన్ తింటే కడుపు నిండుగా ఉన్న ఫీలింగ్ కలుగుతుంది, దీనివల్ల చిరుతిళ్లపై మనసు వెళ్ళదు. ఇక జిమ్కి వెళ్లేవారు కండరాలు దెబ్బతినకుండా ఉండాలంటే కిలో బరువుకు కనీసం 1.2 గ్రాముల ప్రోటీన్ తీసుకోవడం చాలా ముఖ్యం.
మనం ఆరోగ్యంగా ఉండాలంటే ప్రోటీన్ను నిర్లక్ష్యం చేయకూడదు. పప్పు ధాన్యాలు, పాలు, గుడ్లు, సోయా వంటి ఆహారాలను రోజూ తీసుకోవడం వల్ల ఈ లోపాన్ని భర్తీ చేయవచ్చు. మీ వయసు, బరువుకు తగ్గట్టుగా సరైన మోతాదులో ప్రోటీన్ తీసుకుంటే ఎల్లప్పుడూ ఫిట్గా ఉండవచ్చు.
గమనిక:పైన ఇచ్చిన సమాచారం కేవలం అవగాహన జొసం మాత్రమే, కిడ్నీ సమస్యలు ఉన్నవారు లేదా ఇతర ఆరోగ్య సమస్యలు ఉన్నవారు ప్రోటీన్ మోతాదు పెంచే ముందు కచ్చితంగా డాక్టర్ సలహా తీసుకోవాలి.
