నేటి కాలంలో చాలామంది మహిళలు ఎదుర్కొంటున్న ప్రధాన సమస్యల్లో హార్మోన్ల అసమతుల్యత ఒకటి. మారిన జీవన శైలి, ఒత్తిడి మాత్రమే అనుకుంటే పొరపాటే! మనం నిత్యం వాడే ప్లాస్టిక్ వస్తువుల్లో ఉండే థాలేట్స్ (Phthalates) అనే రసాయనాలు కూడా ఇందుకు ప్రధాన కారణమని తేలింది. అసలు ఈ రసాయనాలు మహిళల ఆరోగ్యంపై ఎలాంటి ప్రభావం చూపుతాయో, ఏయే అనారోగ్య సమస్యలకు దారితీస్తాయో ఇప్పుడు వివరంగా తెలుసుకుందాం..
థాలేట్స్ అంటే ఏమిటి?: ప్లాస్టిక్ ఉత్పత్తులను మెత్తగా, వంగేలా చేయడానికి ‘థాలేట్స్’ అనే రసాయనాలను ఉపయోగిస్తారు. మనం ఇంట్లో వాడే అనేక ప్లాస్టిక్ వస్తువుల ద్వారా ఇవి మన శరీరంలోకి ప్రవేశిస్తాయి. ఇక ప్రతీ పది మందిలో ఇద్దరు మహిళలు ఈ రసాయనాల ప్రభావం వల్ల శరీరంలో హార్మోన్ల సమతుల్యతను కోల్పోతున్నారని పరిశోధనలు చెబుతున్నాయి.
హార్మోన్ల అసమతుల్యత – రుతుక్రమ సమస్యలు: ఈ రసాయనాలు శరీరంలోని హార్మోన్ల వ్యవస్థను పూర్తిగా దెబ్బతీస్తాయి. దీనివల్ల పీరియడ్స్ సక్రమంగా రాకపోవడం, ఆ సమయంలో తీవ్రమైన కడుపునొప్పి రావడం వంటి సమస్యలు తలెత్తుతాయి. ఇక మహిళల్లో వయస్సు, ఆరోగ్య పరిస్థితులను బట్టి హార్మోన్ల మార్పులు సహజమే అయినప్పటికీ, ఈ రసాయనాలు ఆ సమస్యను మరింత తీవ్రతరం చేస్తాయి.
సంతానోత్పత్తిపై ప్రభావం: థాలేట్స్ వల్ల మహిళల్లో గర్భం దాల్చడంలో తీవ్రమైన ఇబ్బందులు ఎదురవుతాయి. సంతానోత్పత్తి వ్యవస్థపై ఇవి ప్రతికూల ప్రభావం చూపుతాయి. అంతేకాకుండా ఎండోమెట్రియోసిస్ మరియు రొమ్ము క్యాన్సర్ వంటి ప్రమాదకరమైన ఆరోగ్య సమస్యలకు కూడా ఇవి దారితీసే అవకాశం ఉందని నిపుణులు హెచ్చరిస్తున్నారు.
మహిళల ఆరోగ్యాన్ని దెబ్బతీస్తున్న ప్లాస్టిక్ మరియు అందులోని థాలేట్స్ రసాయనాల పట్ల ప్రతి ఒక్కరూ అవగాహన పెంచుకోవాలి. ఇక వీలైనంత వరకు ప్లాస్టిక్ వస్తువుల వాడకాన్ని తగ్గించి, సహజమైన మరియు సురక్షితమైన ఉత్పత్తులను ఉపయోగించడం మన ఆరోగ్యానికి ఎంతో మంచిది అని నిపుణులు తెలుపుతున్నారు.
గమనిక: తీవ్రమైన హార్మోనల్ సమస్యలు లేదా పీరియడ్స్ సంబంధిత ఇబ్బందులు ఉన్నట్లయితే సొంత వైద్యం చేసుకోకుండా తగిన వైద్య పరీక్షల కోసం వెంటనే గైనకాలజిస్ట్ను సంప్రదించడం శ్రేయస్కరం.
