చెన్నై: చెన్నైకి చెందిన విజయన్ భార్య కోసం పోలీస్ కమిషనర్ అవతారం ఎత్తి జైలు పాలయ్యాడు. లారీ వ్యాపారంలో నష్టాలు రావడంతో కొంతకాలం విజయన్ ఇంటిపట్టునే గడిపాడు. ఈ క్రమంలో భార్య ఏ పనిచేయడం లేదని నిలదీశారు. దీంతో గ్రూప్‌–1 పాసై పోలీస్ కమిషనర్‌గా ఉద్యోగోన్నతి పొందినట్లు అబద్ధం చెప్పారు. స్నేహితురాలి సహకారంతో సైరన్‌తో కూడిన పోలీస్ జీప్‌‌ను కొనుగోలు చేశారు. దాంతో పోలీస్ అధికారి అవతారమెత్తి పలువురి వద్ద డబ్బులు వసూలు చేశారు. కమిషనర్ గెటప్‌లో వెళ్తుండగా దిండుగల్లు జిల్లా లక్ష్మీపురం టోల్‌గేట్‌ వద్ద వాహనాల తనిఖీల్లో విజయన్ బాగోతం బయటపడింది.
దీంతో విజయన్ ను అదుపులోకి తీసుకుని విచారించారు. వాహనం, నకిలీ ఐడీ కార్డు, యూనిఫాం, తుపాకీ స్వాధీనం చేసుకున్నారు. అనంతరం అరెస్ట్ చేసి రిమాండ్‌కు తరలించారు. అయితే పోలీసుల ప్రాథమిక దర్యాప్తులో పలు ఆసక్తికరమైన విషయాలు వెలుగులోకి వచ్చాయి. తమిళనాడుతోపాటు ఆంధ్రప్రదేశ్, కేరళ, పుదుచ్చేరి రాష్ట్రాల్లోని రాజకీయ ప్రముఖులు, ఐఏఎస్, ఐపీఎస్‌ అధికారులతో దిగిన ఫొటోలను పోలీసులు గుర్తించారు. మాజీ ముఖ్యమంత్రి చంద్రబాబునాయుడుతో సన్నిహితంగా ముచ్చట్లాడుతున్న ఫొటో సైతం ఉండడం గమనార్హం. ఓ ప్రైవేట్‌ న్యూస్‌ చానల్‌లో విలేకరిగా పనిచేసేటపుడు వారితో ఫొటోలకు దిగినట్లు నిందితుడు విచారణలో వెల్లడించారు.
