తెలంగాణ రాష్ట్ర స్థాయి పోలీస్‌ నియామక మండలి (టీఎస్‌ఎల్పీఆర్బీ) ఈ నెల 7న నిర్వహించనున్న ఎస్సై ప్రిలిమినరీ పరీక్షకు విస్తృత ఏర్పాట్లు చేసింది. ఆదివారం ఉదయం నిర్వహించనున్న పరీక్షకు హైదరాబాద్‌ నగరం, చుట్టు పక్కల ప్రాంతాల్లో 503, ఇతర పట్టణాల్లో 35 కలిపి మొత్తం 538 కేంద్రాలను ఏర్పాటు చేశారు. 554 ఎస్సై పోస్టులకు 2,47,217 మంది అభ్యర్థులు సిద్ధమవుతున్నారు. శుక్రవారం అర్ధరాత్రి 12 గంటలతో హాల్‌టికెట్ల డౌన్‌లోడ్‌ గడువు ముగిసింది. అయితే.. ఈ నిబంధనలు మరవొద్దు
- ఎస్సై ప్రిలిమ్స్‌ హాల్‌టికెట్‌ను డౌన్‌లోడ్‌ చేసుకున్న తర్వాత అభ్యర్థులు వాటిని ఏ4 సైజ్‌లో రెండు వైపులా(హాల్‌టికెట్‌ ఒకవైపు, వెనుక వైపు సూచనలు ) వచ్చేలా ప్రింట్‌ అవుట్‌ను తీసుకోవాలి. కలర్‌లో ప్రింట్‌ అవుట్‌ అవసరం లేదు.
- ప్రింట్‌అవుట్‌ తీసుకున్న తర్వాత దానిలో ఎడమవైపు కింది భాగంలో ఇచ్చిన బాక్స్‌లో పాస్‌పోర్ట్‌ సైజ్‌ ఫొటోను అతికించాలి. పిన్నులతో, గుండు పిన్నులతో ఫొటోలు పెట్టొద్దు.
- పాస్‌పోర్ట్‌ సైజు ఫొటో దరఖాస్తు సమయంలో అప్‌లోడ్‌ చేసినలాంటిదే ఉండాలి.
- ఫొటో అతికించని హాల్‌టికెట్‌తో వచ్చే అభ్యర్థులను పరీక్ష కేంద్రం లోపలికి అనుమతించరు.
- పరీక్ష కేంద్రంలోకి బ్లాక్‌ లేదా బ్లూ బాల్‌ పాయింట్‌ పెన్నులు అనుమతిస్తారు.
- పరీక్ష కేంద్రంలో అభ్యర్థులకు బయోమెట్రిక్‌ విధానంలో హాజరు తీసుకుంటారు. కాబట్టి, అభ్యర్థులు చేతులకు మెహందీ, టెంపరరీ టాటూలు పెట్టుకోకూడదు.
- అభ్యర్థులు మొబైల్స్‌, ట్యాబ్లెట్లు, పెన్‌ డ్రైవ్‌, బ్లూటూత్‌ డివైజ్‌, రిస్ట్‌వాచ్‌, వ్యాలెట్‌, విడి కాగితాలు వెంట తీసుకురాకపోవడమే ఉత్తమం. వీటిని పరీక్ష కేంద్రంలోకి అనుమతించరు.
